Rusiya Təhlükəsizlik Şurasının sədr müavini, sabiq prezident Dmitri Medvedev ABŞ-ın Rusiyaya qarşı yeni sanksiyalarını və Prezident Donald Trampın Budapeşt sammitini ləğv etməsini “Rusiyaya qarşı müharibə aktı” adlandırıb.

Bu barədə Medvedev oktyabrın 23-də “MAX” platformasındakı kanalında paylaşım edib.

“Əgər çoxsaylı şərhçilərdən kimdəsə hələ də illüziyalar qalıbsa, buyurun. ABŞ bizim düşmənimizdir. Onların çox danışan ‘sülhməramlısı’ indi tam olaraq Rusiya ilə müharibə yoluna qədəm qoyub”, — Medvedev bildirib.

O, əlavə edib ki, Trampın hərəkətlərinə bəraət qazandırmaq mümkün deyil və bu, qərarların mahiyyətini dəyişmir:

“Bu, əsas məsələni dəyişmir: qəbul edilmiş qərarlar Rusiyaya qarşı müharibə aktıdır. İndi Tramp ağlını itirmiş Avropa ilə tam həmrəydir.”

Medvedevin bu açıqlaması ABŞ-ın Rusiyaya qarşı enerji, müdafiə və maliyyə sektorlarını hədəf alan yeni sanksiyaları elan etməsindən, həmçinin Donald Trampın Budapeştdə keçirilməsi planlaşdırılan Rusiya–ABŞ sammitini ləğv etməsindən dərhal sonra səslənib.

Qərb mətbuatına görə, Vaşinqton və Avropa İttifaqı tərəfindən eyni gündə açıqlanan sanksiyalar “Rosneft”, “Gazprombank” və bir neçə yüksək vəzifəli rusiya rəsmisinə qarşı yönəlib. (Reuters, Washington Post)

Analitiklərin fikrincə, Medvedevin “müharibə aktı” ifadəsi Moskvanın Qərbin son addımlarını yalnız iqtisadi və diplomatik deyil, həm də təhlükəsizlik baxımından birbaşa təhdid kimi qəbul etdiyini göstərir.

Hazırda Rusiya hökumətinin bu bəyanatdan sonra hansı cavab addımlarını atacağı məlum deyil.