Almaniyada İkinci Dünya Müharibəsinin bitməsindən 76 il sonra Berlinin yaxınlığında yerləşən Saksenhausen konslaqerində çalışan 100 yaşlı keçmiş nasist zabitin məhkəməsi başlayıb.

Avrasiya.net xəbər verir ki, o, 3518 nəfərin ölümündə ittiham edilən şəxslərdən biridir.

Cümə axşamı günü başlayan məhkəmə 17 iddiaçının ittihamlarına əsasən başlayıb. Onların arasında düşərgədən sağ çıxan qurbanlar da var.

Almaniyanın gizlilik qanunlarını nəzərə alaraq Cosef S. adlandırılan zabit 21 yaşında olarkən 1942-ci ildə düşərgədə mühafizəçi olaraq işə başlayıb. Onun düşərgədə saxlanılan sovet məhbuslarının güllələnməsində və “Ziklon B” qazı ilə kütləvi qətllərin törədilməsində birbaşa iştirak etdiyi güman edilir.

Qeyd olunur ki, Nasist Almaniyasından olan cinayətkarların mühakimə olunması üçüb vaxt çox azdır, çünki hamısı çox yaşlıdır. Cozef hazırda mühakimə olunan ən yaşlı müttəhimdir.

Qeyd edək ki, Saksenhausen şəhərində yerləşən düşərgədə 1943-cü ildə qaz kamerası yaradılıb və müharibənin sonuna yaxın bu qaz kamerasında 3000 adam öldürülüb.