May ayının sonunda Almaniyadan Azərbaycana növbəti kütləvi deportasiya gözlənilir.

Foto.info.az xəbər verir ki, hakimiyyətin təqiblərindən qacaraq sığınacaq istəyən daha 20-yə yaxın Azərbaycan vətəndaşı çarter reysi ilə Almaniyadan Azərbaycana deportasiya ediləcək

Artıq onlardan bir qismi Düsseldorf hava limanı yaxınlığında Almaniya Miqrasiya və Qaçqınlarla iş üzrə Federal İdarənin (BAMF) tabeliyində olan yataqxanaya yerləşdirilib.

İki nəfərin koronavirus test nəticəsi pozitiv çıxdığı üçün onlar yaşadıqları yataqxanda 14 günlük karantin altına alınıblar.

Onları vətəndə hansı aqibət gözləyəcəyi bəlli deyil.

Məlumatda bildirilir ki, deportasiya ediləcək şəxslər 2015-2019-cu illərdə Almaniyaya gələrək, bu ölkədən sığınacaq istəyən və müraciətləri rədd edilən şəxslərdir. Onların arasında 2019-cu ildə Deggendorf şəhərində Nigeriya və Azərbaycandan olan 30-a yaxın sığınacaq axtaran şəxs arasında kütləvi davada iştirak edənlər də var. Həmin şəxslərdən biri 2020-ci ildə məhkəmə tərəfindən bəraət alsa da, onun sığınacaq istəyi rədd edilib və məhkəmə tərəfindən barəsindən deportasiya qərarı çıxarılıb. Könüllü Azərbaycana qayıtmayan şəxs bu dəfə məcburi deportasiya ediləcək.

Xatırladaq ki, keçən il Nigeriya və Azərbaycandan olan 30-a yaxın sığınacaq axtaran şəxs arasında kütləvi dava olub. Əlbəyaxa davada hər iki tərəfdən xəsarət alanlar olub. Düşərgə binasına ciddi ziyan dəyib. Polisin məlumatına görə, üç mühafizəçi və iki polis daxil olmaqla 10 nəfər yaralanıb. Prokurorluğun məlumatına görə, səkkiz şübhəli şəxs həbs olunub. Bir nigeriyalı və iki azərbaycanlı haqqında həbs qətimkan tədbiri seçilib. Digər beş sığınacaq axtaran şəxs sonradan sərbəst buraxılıb.

Cinayət Polisi ictimai asayişin pozulmasına, vəzifəli şəxslərə qarşı müqavimət və hücum faktına görə cinayət işi başlamaqla araşdırma aparıb.