Dialoq:
- Salam, Bəxtiyar bəy, siz xaricə tez-tez gedirsiniz, nə ilə gedirsiniz?
- Təyyarə ilə, nə olub ki?
- Bilirəm, bəs təyyarəyə?
- Taksi ilə, qısa səfər olanda da maşınla.
- Onu demirəm, təyyarəyə hamını buraxmırlar axı.
- Minik talonu göstərirəm, buraxırlar.
- Onu necə alırsınız?
- Bileti göstərməklə.
- Yox ey, yəni bilet nə ilə alınır?
- Pulla.
- Hansı pulla?
- Baxır da, arada dollarla, arada avro ilə, arada zloty ilə. Təşkilatlar dəvət edirlər, özləri alırlar, nə olub ki?
- Yoxey, gəzirsiniz, mən Biləcəridən o tərəfə gedə bilmirəm, necə olur bu?
- Azzar olur, mən nə edim ki, sən Biləcəridən o tərəfə gedə bilmirsən? İllərdir dava aparırıq ki, Avropa İttifaqı ilə vizasız rejimə keçsin Azərbaycan, səsiniz çıxmır. İllərdir dava edirik ki, AZAL-Buta monopoliyasına son qoyulsun, bizim camaat da 30-40 avroya Avropaya uçsun, səsiniz çıxmır. Aksiya keçirilir ki, heç olmasa, Gürcüstanla quru sərhəd açılsın, Avropaya getmək istəyənlər oradan ucuz uçsunlar, gəlmirsiniz. İndi gedə bilməməyinizin qaramatını hər dəfə hansısa tədbirdə iştirak üçün səfərə çıxanda səfərə çıxan aktivistlərə, jurnalistlərə niyə tökürsünüz?

Bunu cahil, imkansız biri desə, yenə başa düşərəm. Amma bir də görürsən ayda 20 000 AZN qazanan biri yazır ki, 2 ildir heç hara gedə bilmirəm. İşini, gəlirini maraqlanırsan, deyir Mərdakanda torpaq almışam, villa tikdirirəm, ona görə gəzə bilmirəm. Ya da başqası deyir qiymətlər qalxıb, çox işləyirəm, qırağa pul ata bilmirəm ki, mən də harasa gedim. Tamam da, onun günahkarı mənəm ki, ölkədə çox insan normal maaşı olan iş tapmır, tapanda da qiymətlər od tutub yandığına görə kənara 200-300 manat artıra bilmirsiniz?

Sabah təcili bir ehtiyac üçün 1000 manata ehtiyac olsa, desən ki, 20 manatdan 50 nəfərin köməyi lazımdır, heç bu adamlar üzə çıxmazlar, deməzlər ki, nəyəsə ehtiyacın varmı?

Bir də həmin adamlar 20-21 yaşlı məmur övladlarının Londonda Maybachla fotolarının altında "qaqaw, Allah canini saq elesin, qaqaw" yazırlar, o məmur balalarının məşuqələrinin də İbizadakı çimərlik fotolarının altında ağızlarının suyunu axıdırlar, onda yada düşmür artan qiymət də, viza rejimi də, baha biletlər də, işsizlik də, kasıblıq da, sərhədlərin bağlı olması da.

Bəxtiyar Hacıyev