Bakının Xətai rayonu ərazisində yerləşən “50 Qəpik” adlanan restoranda antisanitar vəziyyətlə bağlı başlanılan araşdırmanın nəticəsi bəlli olub.

Bu barədə Azərbaycan Respublikasının Qida Təhlükəsizliyi Agentliyindən foto.info.az-ın sorğusuna cavab olaraq bildirlib.

Qeyd olunub ki, müraciətə Agentliyin Bakı regional bölməsində baxılıb:

“Müraciət əsasında Agentlik əməkdaşları tərəfindən “50 Qəpik” kafesində “Sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında” növbədənkənar yoxlama aparılıb.

Aparılan yoxlama zamanı müəssisədə yaranma ehtimalı fiziki təhlükəli amillər təhlil edilib, qida obyektinin rəhbərliyinə sağlamlaşdırıcı tədbirlərin görülməsi ilə bağlı müvafiq göstərişlər verilib. Eləcə də qanunvericiliyin və texniki normativlərin, hüquqi aktların tələbləri izah olunub. Kritik nəzarət nöqtələri üzrə risk qiymətləndirilməsi aparılıb və nöqsanların aradan qaldırılması ilə bağlı icrası məcburi göstərişlər verilib. Müəssisə rəhbərliyi inzibati məsuliyyətə cəlb edilib və qida öbyektinin fəaliyyəti nəzarətə götürülüb”.

Xatırladaq ki, bir müddət əvvəl “Xətai” metrostansiyasının yaxınlığında yerləşən “50 Qəpik” adlanan restoranda yeməklərin yanında tarakanın gəzdiyinə dair videogörüntülər yayılmışdı.