Baş nazirinin birinci müavini Yaqub Eyyubovun ölkədən çıxararaq Latviyanın paytaxtı Riqa şəhərindəki bankda oğlunun adına köçürdüyü bir milyard dollar vəsait dondurulub. Bu hələ mətbuata məlum olan oğurluq pullardır. Xalqdan gizli qalan 10 milyardlarla pullar haqqında xəbərimiz yoxdur.

Bəlkə də Vasif Talıbovun 35 milyard söhbətindən sonra "əşşi, bu nədir ki, deyəcəksiniz". Ancaq deməyin, çünki bu elə bir rəqəmdir ki, bizi kiminal bir hakimiyyətin idarə etdiyini, korrupsiyanın dövlət siyasəti olduğunu növbəti dəfə təsdiq edir.

Ancaq dəhşətdir, bu adam bu qədər pulu necə oğurlaya bilib? Bunu oğurlayıbsa da ölkədən necə çıxara bilib?
Adam baş nazirin birinci müavini kimi hökumətin Silahlı Qüvvələrə nəzarət edən mühüm şəxsidir. İndi bir daha təsdiq olunur ki, uzun illər ərzində Rusiyanın keyfiyyətsiz silahlarını almağın arxasında təkcə Putinə töycü verməmək öhdəliyi durmayıb, həm də milyardları oğurlamaq niyyəti varmış.
Buna görə onun birinci müavini olduğu hökumət tam tərkibə istefaya göndərilməlidir.

Baş prokurorluq da dərhal cinayət işi başlamalıdır.

Məsələnin siyasi tərəfinə gəldikdə isə, hesab edirəm ki, bu Azərbaycan hakimiyyətinə xəbərdarlıqdır. Rusiyadan uzaqlaş xəbərdarlığı.
Ona görə də, Qərb Rusiya ilə əlaqələri kurasiya edən, bu ölkə ilə xüsusi bağlantıları olduğu şübhə doğurmayan Yaqub Eyyubovdan başladı. Bu təkcə korrupsiya məsələsi deyil, onu seçməklə Azərbaycan hakimiyyətinə geosiyasi mesaj verilib.
Əgər nəticə olmazsa proses daha yuxarıya doğru genişlənəcək.

Bir dəfə demişəm, bir daha təkrar edirəm, Azərbaycan hakimiyyəti öz korrupsiyasının girovluğundadır və Qərb istədiyi vaxt bundan istifadə edib təzyiq göstərə bilər.
İndi də Brüssel masası arxasında oturmamağın bədəlinin çox, lap çox ağır olacağı ilə bağlı ilk ciddi xəbərdarlıq edildi. Sülh prosesi bitəndən sonra, sırada demokratiya məsələsinə görə belə xəbərdarlıqlar gələcək.

Ona görə də, vaxtında islahatlara gedin deyəndə, demokratiya tələblərini boğmağın mümkün olmayacağını, əgər buna təkid etsəniz belə yaranacaq qlobal qarşıdurmanın ağr nəticələrindən qurtula bilməyəcəyiniz nəzərə almaq lazımdır.