Ölkə tarixinin daha bir utanc ilini arxada qoyur. 2023-cü il son saatlarını yaşayır. Bir neçə saatdan sonra 2024-cü il gələcək, yeni təqvim ili başlayacaq. 2023-cü il tarixə qovuşur. Çətin il, ağır il oldu 2023. Bir tərəfdən ölkənin ərazi bütövlüyü, suverenliyi təmin olundu. Digər tərəfədən işğaıçılara qarşı silkələnən dəmir yumruğ Azərbaycan xalqına qarşı çevrildi. Ölkədə çoxlu günahsız adamlar tutuldu. Son döyüşlərdə igid oğullarımız şəhid oldu. İlin əvvəlində qardaş Türkiyə ağır təbii fəlakət yaşadı.
2023-də Kamil Vəli Nərimanoğlu, Arif Acaloğlu kimi ziyalılarımızı, Babək Həsənli kimi qazimizi itirdik. Əlayif bəy kimi peşəsinə hörmətlə yanaşan bir hüquqşünası itirdik. Neçə-neçə qazi ehtiyac ucbatından intihar etdi.
Əslində 2023-cü il hakimiyyətin elan etdiyi Heydər Əliyev ili kimi yox, siyasi məhbuslar ili kimi tarixin yaddaşına düşdü. 2023 başlayanda 100 nəfər ətrafında olan siyasi məhbuslar ilin sonuna doğru 256 nəfər çatdı. Hamısı da günahsız, qurama ittihamlarla tutulan şərəfli insanlar. İki gün əvvəl işgəncə hesabına üzərinə ölüm işi qoyulmuş, 11 il cəza verilmiş, onun 4 ilini zindanda yatmış Polad İsmayılov bəraət aldı. Günahsız adamın üzərinə ölüm işi qoyulub. Polis, prokurorluq, məhkəmə, müstəntiq, dövlət işçisi əlbir olub günahsız adamın üzərinə ölüm işi qoyublar, ölənin qanın batırıblar. Bu qədər hüquq orqanlarından bir qanunsuzıuğun qabağını almayıb.
2023-cü ildə Tofiq Yaqublu həbsdən azad edildi və yenidən həbsə düşüdü, Bütün dünyada öz dələduzluğu ilə ad çıxarmış bir rejim ölkənin ən dürüst insanı olan Tofiq Yaqublunu dələduzluq ittihamı ilə həbs etdi. Dünyanın ən tanınmış iqtisadçı alimi, LSE-nin dəvətli professoru, halal pul qazanmağın sirlərini dünyanın ən tanınmış universitetlərində tələbələrə öyrədən Qubad İbadoğlu saxta pul kəsmək ittihamı ilə həbs edildi. Qurama ittihamla saxlanılmış Bəxtiyar Hacıyev bütün ili həbsdə keçirdi. Söyüdlülərin haqqın müdafiə etdiyi üçün iqtisadçı doktor, iş adamı Nazim Bəydəmirli ekologiya məhbusu oldu. Ekologiya məhbusu olduğu üçün Bakı şəhərində torpaq sahəhəsini əlindən almağın, daha doğrusu bur addan başqa ada keçirməyin yollarını arayırlar. Cəbhənin məhbuslarının sayı 10 nəfərin üzərindədir. Elxan Əliyevi də elə torpaq alqı-satqısı adı ilə ssenariləşdirilmiş əməliyyatla tutublar. Azad olunmuş torpaqlarda infrastruktur layihələrdə natəmiz əməlləri ifşa etdiklərinə görə Abzas Mediadan Üvli Həsənli, Sevinc Vaqifqızı, Hafiz Babalı, Nərgiz Absalamov, Məhəmməd Kekalov, Xalq Cəbhəsindən Əlzamin Salayev, müharibə iştirakçısı Niyaməddin Əhmədov, Elnur Həsənov, Pnhan Kərimli, Razi Alışov, Şahin Hacı, Mütəllim Oruc, Aqil Hümbətov, Elbəyi Kərimli, Kanal-13-dən Əziz Orucov, Rüfət Muradlı, Şamo Emin, jurnalist və ictimai fəallardan Əvəz Zeynallı, Rza Səfərsoy, Teymur Kərimov, Atilla xan, Möhyəddin Orucov, İlhamiz Quliyev, İşçi masasında Afiyəddin Məmmədov saxta, qurama, siyasi ittihamlarala həbsə alınıblar.
2023-cü il Azərbaycan dindarlarının kütləvi həbsi və təqibi ilə tarixin yaddaşına oturdu. Nə Allah lənət eləmiş Fironun dövründə kahinlər, nə Abbasi xəlifəsi Harun ər-Rəşidin dövründə alim və üləmalar, nə də Sovet Azərbaycanının KGB rəhbərləri Stepan Yemelyanov, Andrey Bluqa, Anatoli Quskov, Aleksandr Kardaşov, Semyon Sviqun, Heydər Əliyev dövründə Azərbaycan dindarları, islam üləmaları və ölkədə islam dini İlham Əliyevin dövründə olduğu kimi kütləvi təqiblərə məruz qalmamışdı, saxta ittihamlarla (daha çox narkotika ittihamı) həbs edilməmişdi. Dinsiz dövlət olan Sovet dövlətinin bütün tarixi ərzində bu qədər dindar və din xadimləri həbs edilməmişdi. Tale Bağırzadə, Abbas Hüseyn, Əhsən Nuruzadə, Ağaəli Yəhyayev, Nizami Əhmədov, Hacı Siyasət Bağırov və 150 yaxın ruhani, üləma, iman əhli saxta ittihamlarla zindana atılıblar. Hazırda ölkədə olan 256 siyasi məhbusun 150-yə yaxını dindar məhbuslardır. Hər dəfə İranla münasibətlərin gərginləşməsi Azərbaycan dindar vətəndaşlarının kütləvi təqibi və həbsi ilə nəticələnir. Bax, yola saldığımız 2023-cü il bu qədər doğru-dürüst, təmiz, vətənsevər, imanlı adamların həbsi ilə yadda qalır. Ölkə adına bu böyük utancdır. Yeni il axşamı olsa belə. Axı Qubad İbadoğlu kimi, Tofiq Yaqublu kimi, Ülvi Həsənli kimi, Sevinc Vaqifqızı kimi, Niyaməddin Əhmədov kimi bütün varlığı ilə vətənə xidmət edən adamları bu yeni il axşamı necə həbsdə saxlamaq olar.