Rusiyanın müdafiə nazirinin keçmiş müavini, general-polkovnik Yuri Sadovenkonun vəfat etdiyi bildirilir. Məlumata görə, 56 yaşlı generalın ölümünə ürək xəstəliyi səbəb olub. Rəsmi açıqlamada başqa detallar yer almayıb.

Yuri Sadovenko uzun illər Rusiyanın keçmiş müdafiə naziri Sergey Şoyqunun yaxın silahdaşlarından biri kimi tanınıb. Şoyqu fövqəladə hallar naziri olduğu dövrdə Sadovenko onun köməkçisi, Moskva vilayətinin qubernatoru olarkən aparat rəhbəri, müdafiə naziri təyin edildikdən sonra isə nazir müavini vəzifələrində çalışıb. Faktiki olaraq, Şoyqunun karyerası boyunca Sadovenko da onunla birlikdə müxtəlif yüksək postlarda yer alıb.

2024-cü ilin may ayında Sergey Şoyqunun müdafiə naziri vəzifəsindən uzaqlaşdırılmasından sonra Yuri Sadovenko da tutduğu vəzifədən azad edilmişdi.

Qeyd edək ki, son illər Rusiyada yüksək rütbəli hərbçilər və məmurlar arasında baş verən gözlənilməz ölümlər diqqət çəkir. Ekspertlər bunu Kremlin daxilində güc, təsir dairəsi və resurslar uğrunda gedən kəskin mübarizə fonunda dəyərləndirirlər. Rusiyanın siyasi elitasında bu cür mübarizələrin çox vaxt ağır nəticələrlə müşayiət olunduğu vurğulanır.