Dekabrın 22-də Bakı Ağır Cinayətlər Məhkəməsində hakim Roman Ələkbərlinin sədrliyi ilə “Meclis.info işi” üzrə növbəti məhkəmə iclası keçirilib.

Məhkəmə prosesində təqsirləndirilən İmran Əliyev, eləcə də polis nəzarəti altında olan Elgiz Qəhrəman və Tamella Musayeva iştirak ediblər. İclas zamanı şahidlərin dindirilməsi aparılıb.

Şahid qismində ifadə verən “German Marşal Fondu”nun (GMF) Azərbaycan üzrə məsləhətçisi Mehriban Rəhimli bildirib ki, təqsirləndirilən şəxslərdən yalnız İmran Əliyev və Elgiz Qəhrəmanı tanıyır. Onun sözlərinə görə, İmran Əliyevin rəhbərlik etdiyi “Meclis.info” platforması bir layihə üçün GMF-ə müraciət edib və tərəflər arasında xidmət müqaviləsi əsasında əməkdaşlıq qurulub.

Rəhimli qeyd edib ki, müqavilədən sonra GMF-in Vaşinqtondakı bank hesabından “Meclis.info”nun Azərbaycandakı bank hesabına vəsait köçürülüb:
“İmran müvafiq vergiləri ödədikdən sonra qalan vəsaiti layihəyə sərf edib. Heç vaxt İmran Əliyevlə qrant müqaviləsi imzalamamışıq”.

Şahidin sözlərinə görə, layihənin icrası daim nəzarətdə saxlanılıb və hər hansı pozuntu aşkar edilməyib. O, layihə çərçivəsində millət vəkilləri və dövlət xadimlərinin iştirakı ilə ictimai müzakirələrin təşkil olunduğunu da bildirib. Mehriban Rəhimli Elgiz Qəhrəmanı sosial şəbəkələrdən ictimai fəal və keçmiş siyasi məhbus kimi tanıdığını qeyd edib.

Daha sonra digər şahidlər də ifadə veriblər.

Məhkəmə iclasa gəlməyən 5 şahidin məcburi qaydada gətirilməsi barədə qərar çıxarıb. Növbəti məhkəmə iclası 2026-cı il yanvarın 27-nə təyin edilib.

Qeyd edək ki, İmran Əliyev 2024-cü il aprelin 18-də Bakı Beynəlxalq Hava Limanında saxlanılıb. Ona əvvəlcə Cinayət Məcəlləsinin 206.3.1 və 206.3.2-ci (qaçaqmalçılıq) maddələri ilə ittiham irəli sürülüb, daha sonra ittihamların genişləndirildiyi bildirilib. Elgiz Qəhrəman və Tamella Musayeva isə 2025-ci ilin fevralında cinayət məsuliyyətinə cəlb olunub və onlar barəsində polis nəzarəti qətimkan tədbiri seçilib.

Hazırda hər üç şəxs barəsində 12 ilədək azadlıqdan məhrumetmə cəzası nəzərdə tutan 8 ağır maddə ilə ittiham irəli sürülüb. Yerli və beynəlxalq hüquq müdafiəçiləri “Meclis.info işi”ni siyasi motivli hesab edir və təqsirləndirilən şəxslərin azadlığa buraxılmasını tələb edirlər.