Fransa hökuməti Moldovanın keçmiş baş naziri Vladimir Filatı İnterpol xətti ilə beynəlxalq axtarışa verib. Bu barədə Moldova Daxili İşlər Nazirliyinin mətbuat katibi Diana Fetko jurnalistlərə məlumat verib.

Xarici KİV-in məlumatına görə, bundan əvvəl Fransa məhkəməsi Vladimir Filatı çirkli pulların yuyulması ittihamı ilə iki il müddətinə azadlıqdan məhrum edib. Filat isə Fransada çıxarılan hökmün Kişinyovun siyasi təsiri altında qəbul edildiyini iddia edib.

Qeyd olunur ki, Moldova qanunvericiliyinə əsasən, ölkə öz vətəndaşını Fransaya ekstradisiya edə bilməz. Bununla belə, tərəflər arasında ittihamların tanınması və məhkəmə hökmünün Moldova ərazisində icra olunması ilə bağlı razılaşma əldə edilə bilər.

KİV-in yazdığına görə, cinayət işi Filat və onun həyat yoldaşının 2012 və 2014-cü illərdə Fransanın cənub-şərqində aldıqları daşınmaz əmlakla bağlıdır. Hüquq-mühafizə orqanları həmin əmlakın korrupsiya yolu ilə əldə edilmiş vəsait hesabına alındığını düşünür.

Vladimir Filat hazırkı Moldova prezidenti Maya Sandunun siyasətinin kəskin tənqidçilərindən biri kimi tanınır. O, 2016-cı ilin iyununda Moldovada vəzifə səlahiyyətlərindən sui-istifadə və passiv korrupsiya ittihamları ilə doqquz il azadlıqdan məhrum edilmiş, cəzanın təxminən dörd ilini həbsdə çəkdikdən sonra azadlığa buraxılmışdı.

Filat özünü heç vaxt təqsirli bilmədiyini bildirib və həbsinin hakim koalisiyadakı keçmiş tərəfdaşı, Demokrat Partiyasının lideri Vladimir Plahotnyukun siyasi sifarişi olduğunu iddia edib.