Jurnalist Şəmşad Ağa hakimə: “Get övladlarının gözlərinə bax və nə qədər ədalətsiz qərar verdiyini düşün”

“Mənim məhkəməm bir az uzun çəkdi. Hakim, prokuror və müstəntiq gətirdiyim arqumentlərə əsaslı cavab verə bilmirdilər. Arada hakimi cırnatmaq üçün dedim: “Bilirsiniz niyə zəifsiniz? Çünki mən “Arqument”in rəhbəriyəm!”.

Həbsdə olan “Arqument.az” saytının baş redaktoru Şəmşad Ağanın ictimaiyyətə ünvanladığı məktubun üçüncü - sonuncu hissəsi yayımlanıb.

Məktubun əvvəlki hissələrini buradan oxuyun.

Məktubun sonuncu hissəsini jurnalist Elməddin Şəmilzadə “Facebook” səhifəsində paylaşıb.

Ağa məktubun bu hissəsində dindirilmə və məhkəmə proseslərini təsvir edib, həmçinin həbsi ilə bağlı düşüncələrini bölüşüb.

Jurnalist məktubun əvvəlki hissəsində gecə saatlarında mülki geyimli şəxslər tərəfindən oğurlanmasını və evində axtarış aparılmasını təsvir etmişdi. O, daha sonra dindirilmə üçün polis idarəsinə aparılmışdı.

Bu hissədə isə o bildirir ki, yalnız vəkil Şəhla Hümbətova gəldikdən sonra ifadə verib və ona aid olmayan suallara cavab verməkdən imtina edib.

“Həm özümün, həm də “Meydan”çıların, “Toplum”çuların və “Abzas”çıların həbsinin siyasi sifariş və azad sözün qətli olduğunu ifadəmdə qeyd etdim”, - Şəmşad Ağa yazıb.

O əlavə edib ki, peşə fəaliyyətinə görə həbsə düşməyindən peşman deyil.

“Peşman idimmi? Qəti! Özüm seçdiyim bir taleyin sınağı ilə üz-üzə idim.

Müstəntiq çox güman evində idi. Uşaqlarının saçını sığallayıb onların gələcəyi ilə bağlı xəyallar qururdu. Mənimsə haqqımda qızım düşünürdü, zalımın zülmünə məruz qalan atasının harada olduğunu əmisindən sorğulayırmış. Amma mənim qızım bu olanları daha qürurla xatırlayacaq, çünki onun atası günahsız birini şərləyib və ya onun haqqında verilmiş şər qərarı icra edib evinə getməmişdi.”

Ağa yazır ki, saxlandığı müvəqqəti cəzaçəkmə məntəqəsində polislərdən biri ona siyasi məhbus olduğunu deyib, o da cavabında gülüb və bunun “ilk rəsmi etiraf” olduğunu bildirib.

Jurnalist məhkəməyə onunla eyni gündə saxlanılan digər jurnalist Şahnaz Bəylərqızı ilə eyni avtomobildə aparıldığını qeyd edib.

“Söhbətləşdik, körpələrinə görə narahat idi. Ona görə də yolda xeyli zarafatlaşıb əhvalını açmağa çalışdım. İnsafən, bizi aparan polis qadınlar da mane olmadılar söhbətimizə. Sonra məhkəməyə çıxarıldıq. Binaya girəndə çöldəki dostların dəstəyi də qürurverici idi. Şahnazın məhkəməsi tez bitdi. Məndə isə bir az uzun çəkdi. Hakim, prokuror və müstəntiq gətirdiyim arqumentlərə əsaslı cavab verə bilmirdilər. Arada hakimi cırnatmaq üçün dedim: “Bilirsiniz niyə zəifsiniz? Çünki mən “Arqument”in rəhbəriyəm”.

Şəmşad Ağa ardınca yazır ki, məhkəmə prosesində hakim onun sözünü tez-tez kəsib və onu “cinayətkar” adlandırıb. O isə hakimə deyib ki, “mən sənin yox, İlham Əliyevin məhbusuyam”.

“Cənab hakim, “vicdanınızın səsinə qulaq asın” demirəm, olsa ananı baladan ayırmazdınız. Get övladlarının gözlərinə bax və nə qədər ədalətsiz qərar verdiyini düşün…”, - dedim, əsəbləşmişdi.”

Jurnalist Şəmşad Ağa bu ilin fevralın 5-də “Meydan TV işi” ilə bağlı saxlanılıb.

Ona qarşı qaçaqmalçılıq — qabaqcadan əlbir olan bir qrup şəxs tərəfindən törədildikdə maddəsi ilə ittiham irəli sürülüb.

2024-cü il dekabrın 6-da Meydan TV-nin əməkdaşları Ramin Deko, Aynur Elgünəş, Aysel Umudova, Aytac Tapdıq, Xəyalə Ağayeva, Natiq Cavadlı saxlanılıblar. Onlara qarşı qaçaqmalçılıq, əvvəlcədən əlbir olan bir qrup şəxs tərəfindən törədildikdə maddəsi ilə ittiham irəli sürülüb.

Meydan TV əməkdaşları ilə yanaşı, eyni gündə vətəndaş cəmiyyətinin üzvü Ülvi Tahirov da saxlanılıb. Eyni ittihamla onun da barəsində 4 aylıq həbs qətimkan tədbiri seçilib. Onun Meydan TV-yə aidiyyəti yoxdur.

Fevralın 20-də isə jurnalist Nurlan Libre də bu işlə əlaqəli saxlanılıb və barəsində 1 ay 17 gün müddətinə həbs qətimkan tədbiri seçilib.

Fatimə Mövlamlı da fevralın 28-də “Meydan TV” ilə əlaqəli cinayət işinə görə saxlanılıb və barəsində 1 ay 9 gün müddətinə həbs qərarı verilib.

Saxlanılan jurnalistlərin heç biri özünü təqsirli bilmir.