USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Jurnalist Ülviyyə Əlinin saxlanılarkən zorakılığa məruz qaldığı bildirilir. Dəfələrlə qusub
“Meydan TV işi” üzrə saxlanılan jurnalist Ülviyyə Əlinin (Quliyeva) polis idarəsində fiziki zorakılığa məruz qaldığı iddia olunur. Bu barədə həmkarı, hazırda eyni iş üzrə həbsdə olan jurnalist Aytac Tapdıq ailəsi vasitəsilə məlumat yayıb.
Aytac Tapdıqın verdiyi məlumata görə, Ülviyyə Əli saxlanıldığı zaman başına aldığı zərbələr nəticəsində ciddi səhhət problemləri yaşamağa başlayıb. Bildirilir ki, o, başında güclü ağrılardan əziyyət çəkir və bir neçə dəfə qusma halları keçirib – iki dəfə müvəqqəti saxlama yerində, bir dəfə isə Kürdəxanı istintaq təcridxanasında.
Tapdıq həmkarının sağlamlıq vəziyyətinin kritik olduğunu qeyd edərək, təcili tibbi və hüquqi müdaxiləyə ehtiyac olduğunu bildirib: “Ülviyyə Əlinin başına gələn hər şeyə görə Azərbaycan hakimiyyəti məsuliyyət daşıyır”.
Rəsmi qurumlar hələlik yayılan məlumatlara münasibət bildirməyib.
Qeyd edək ki, Ülviyyə Əli mayın 7-də saxlanılıb və ona qarşı Cinayət Məcəlləsinin 206.3.2-ci (qaçaqmalçılıq, qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülüb. Jurnalist saxlanılmadan əvvəl yaydığı bəyanatda Meydan TV ilə hər hansı işgüzar əlaqəsinin olmadığını, olsaydı belə, bunu cinayət kimi görmədiyini bəyan etmişdi.
“Meydan TV işi” çərçivəsində ötən ilin dekabrından bu yana bir neçə jurnalist saxlanılıb. Onların heç biri özünü təqsirli hesab etmir.
