6 aydır həbsdə olan tiktoker və şair İlhamə Elşadqızı (Əsgərova) özünün şər və böhtanla həbs olunduğunu deyir. O, mayın 14-də Bakı Ağır Cinayətlər Məhkəməsində verdiyi ifadəsində bildirib ki, TikTok-da səsləndirdiyi fikirlərə görə narkotik ittihamı ilə həbs edilib.

“Bu yaşımda mənə qara ləkə vururlar. Narkotik, narkomaniya nədir? Mənə böhtan atıb əllərimi qandalladılar, təhqir etdilər, başımı divara vurdular. Allah yuxarıdan baxır”, – deyə Elşadqızı məhkəmədə danışıb.

Onun sözlərinə görə, TikTok platformasında səsləndirdiyi ifadəyə görə həbs olunduğu açıq şəkildə özünə bildirilib. Sağlamlıq durumunun ağır olduğunu və bir neçə dəfə cərrahiyyə əməliyyatı keçirdiyini deyən İlhamə Elşadqızı hazırda istədiyi qidaları belə yeyə bilmədiyini də vurğulayıb.

“Şairəyəm, televiziya proqramlarında ekspert kimi çıxış etmişəm. Mənim yerim Kürdəxanıdakı istintaq təcridxanası deyil. Məni gah dəlixanaya aparırlar, gah narkoman kimi qan analizinə göndərirlər. Qanım da tərtəmizdir. Bu nə münasibətdir mənə qarşı?!” – deyə o, məhkəmə qarşısında sual edib.

Onun vəkili müvəkkilinin məhkəmə hökmü çıxana qədər ev dustaqlığına buraxılması üçün vəsatət versə də, hakimlər bunu təmin etməyib.

İlhamə Elşadqızı 2024-cü ilin dekabrından bəri həbsdədir. O, Cinayət Məcəlləsinin 234.1-1-ci maddəsi ilə – satış məqsədi olmadan külli miqdarda narkotik əldə etmə, daşıma və saxlama – ittiham olunur. Bu maddə ilə 3 ildən 8 ilədək azadlıqdan məhrumetmə cəzası nəzərdə tutulur.