Azərbaycan Prezidenti İlham Əliyev və Qazaxıstan Prezidenti Kasım-Jomart Tokayev arasında avqustun 31-də Qırğızıstanın paytaxtı Bişkekdə görüş keçirilib.

İlham Əliyev Qazaxıstanın yeni parlamentinə – Qurultaya keçirilən ilk seçkilərin baş tutması münasibətilə həmkarını təbrik edib. Azərbaycan Prezidenti seçkilərin Tokayevin rəhbərliyi ilə həyata keçirilən islahatlara Qazaxıstan xalqının dəstəyinin göstəricisi olduğunu bildirib.

Kasım-Jomart Tokayev təbrik məktubuna və Azərbaycandan olan müşahidəçilərin seçkilərdə iştirakına görə İlham Əliyevə təşəkkür edib.

Görüşdə Azərbaycan və Qazaxıstan arasında strateji tərəfdaşlıq və müttəfiqlik münasibətlərinin inkişafı müzakirə olunub. Tərəflər əlaqələrin daha da dərinləşdirilməsində yüksək səviyyəli qarşılıqlı səfər və təmasların əhəmiyyətini vurğulayıblar.

Danışıqların əsas mövzularından biri nəqliyyat və logistika əməkdaşlığı, xüsusilə Orta Dəhlizin inkişafı olub. Prezidentlər bu istiqamətdə Azərbaycan və Qazaxıstan arasında əməkdaşlığın genişləndirilməsi perspektivləri barədə fikir mübadiləsi aparıblar.

Dövlət başçıları, həmçinin Asiyada Qarşılıqlı Fəaliyyət və Etimad Tədbirləri üzrə Müşavirənin növbəti sammitinin Bakıda keçirilməsi məsələsinə toxunublar.

Görüşdə gələcək təmaslar və qarşılıqlı maraq doğuran digər məsələlər də müzakirə edilib.