USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
AXCP üzvü Elbəyi Kərimli həbsdə aclıq aksiyası keçirir
Azərbaycan Xalq Cəbhəsi Partiyasının (AXCP) üzvü Elbəyi Kərimli mayın 23-dən etibarən həbsdə aclıq aksiyası keçirir. Bu barədə onun ailə üzvləri məlumat veriblər. Kərimli bildirib ki, “şərlənərək azadlıqdan məhrum edilməsinə” etiraz olaraq aclığa başlayıb.
Elbəyi Kərimli 2023-cü ilin avqustunda ümummilli lider Heydər Əliyevin heykəlinin arxasına “Stalin” sözünü yazdığı üçün saxlanılıb. O, daha sonra Cinayət Məcəlləsinin 234.4.3-cü (satış məqsədilə külli miqdarda narkotik maddə saxlama) maddəsi ilə ittiham olunaraq 6 il azadlıqdan məhrum edilib. Lakin Ali Məhkəmə həmin maddədən “satış məqsədi” ifadəsini çıxararaq, cəzanı 5 ilə endirib.
Kərimli hüquq-mühafizə orqanlarında başına gələnlərlə bağlı vəkilinə açıqlamasında bildirib: “Polis bölməsində mənə dedilər ki, ya narkotik, ya da silah – birini seçməlisən, yoxsa səni vətənə xəyanət ittihamı ilə tutacağıq. Hərbi obyektlərin şəkillərini telefonuna yükləyərik, deyərik ki, hərbi sirri Ermənistana, İrana ötürmüsən. Eşitdiklərimdən boğazım qurudu. Dedilər ki, elə eləmə ki, Qiyas kimi evindən 1 kilo narkotik çıxaraq…”
Bu hadisə 2016-cı ildə ictimai fəallar Qiyas İbrahimov və Bayram Məmmədovun başına gələnləri xatırladır. Həmin il onlar Heydər Əliyevin heykəlinə “Qul bayramınız mübarək!” yazdıqları üçün narkotik ittihamı ilə həbs olunmuş və hər biri 10 il azadlıqdan məhrum edilmişdi. Onlar 2019-cu ildə prezidentin əfv sərəncamı ilə azadlığa buraxılmışdılar.
Hazırda Elbəyi Kərimlinin səhhəti ilə bağlı narahatlıqlar artır, ailəsi və hüquq müdafiəçiləri onun durumuna diqqət yetirilməsini tələb edirlər.
