“İşçi Masası” Konfederasiyası Ombudsman və Penitensiar Xidmətdən araşdırma tələb edir

“İşçi Masası” Həmkarlar İttifaqları Konfederasiyası üzvü Elvin Mustafayevin 6 saylı cəzaçəkmə müəssisəsində işgəncəyə məruz qaldığı bildirilir. Konfederasiya yayımladığı açıqlamada onun müəssisə rəisi Fariz Əliyev və iki əməliyyatçı tərəfindən döyüldüyünü iddia edir.

Məlumata görə, Elvin Mustafayev 2025-ci il mayın 6-dan müxalif siyasətçi Tofiq Yaqublu və digər siyasi məhbusların azad olunması tələbilə aclıq aksiyasına başladıqdan sonra əvvəlcə 13 saylı cəzaçəkmə müəssisəsində karserə salınıb, daha sonra isə 6 saylı cəzaçəkmə müəssisəsinə köçürülüb.

Konfederasiya bildirir ki, yeni müəssisəyə gətirilən kimi Mustafayev müəssisə rəisi Fariz Əliyevin otağına aparılıb və orada təhqir olunaraq döyülüb:

“Elvinin yaxınlarına verdiyi məlumata görə, otağa daxil olan kimi rəis Fariz Əliyev ona ‘bura, gəldiyin zonalar kimi deyil, burada ağıllı ol’ deyərək onun üzünə şillə vurub. Etiraz etdikdə isə iki rejim əməliyyatçısı – Samir və Əli – ona qarşı ağır fiziki zorakılıq tətbiq ediblər.”

İddialara görə, Elvin Mustafayevin baş və bədən nahiyələrinə dəfələrlə zərbələr endirilib, nəticədə onun qulağı zədələnib və huşunu itirib. Bir aydan artıq vaxt keçməsinə baxmayaraq, onun bədənində ağrılar və qulağında iltihab davam edir.

Konfederasiya baş verənlərlə bağlı Ombudsmana və Ədliyyə Nazirliyinin Penitensiar Xidmətinə müraciət edib, adıçəkilən şəxslərin məsuliyyətə cəlb olunmasını tələb edib.

Ədliyyə Nazirliyi və Penitensiar Xidmət isə məsələ ilə bağlı hələlik rəsmi açıqlama verməyib.

Elvin Mustafayevin vəkili Zibeydə Sadıqova iyunun 18-də Meydan TV-yə bildirib ki, müvəkkili ilə görüşüb və onun səhhətində ciddi problemlərin yarandığını təsdiqləyib. Onun sözlərinə görə, 6 saylı müəssisə Elvin Mustafayevin cəzasının ciddi rejimli Qobustan həbsxanasında çəkilməsi üçün Nizami Rayon Məhkəməsinə təqdimat verib. Məhkəmə iclasının iyunun 19-da keçirilməsi planlaşdırılsa da, daha sonra tarixin dəyişdirildiyi və hazırda dəqiq vaxtın məlum olmadığı bildirilir.

Elvin Mustafayev 2023-cü il avqustun 4-də saxlanılıb və Cinayət Məcəlləsinin 234.1-1-ci maddəsi ilə (narkotik vasitələrin qanunsuz dövriyyəsi) ittiham olunaraq 2024-cü il yanvarın 31-də Bakı Ağır Cinayətlər Məhkəməsinin hökmü ilə 3 il azadlıqdan məhrum edilib. O, ittihamları qəbul etmir və narkotik maddənin üzərinə qoyulduğunu bildirir.

Qeyd edək ki, 2022-ci ildə yaradılmış “İşçi Masası” Konfederasiyasının digər üzvləri – sədr Afiəddin Məmmədov, Ayxan İsrafilov və Möhyəddin Orucov da hal-hazırda həbsdədir. Onların hər biri irəli sürülən ittihamların siyasi sifarişlə qurulduğunu iddia edir.

Hazırda məsələ ictimai diqqət mərkəzindədir və rəsmi qurumların mövqeyi gözlənilir.