“AbzasMedia”nın direktoru Ülvi Həsənli iyunun 26-dan etibarən aclıq aksiyasına başlayıb. Bu barədə məlumatı həyat yoldaşı Rübabə Quliyeva yayıb. Onun sözlərinə görə, Həsənli hazırda Umbakı Penitensiar Kompleksində cərimə kamerasında saxlanılır və aclığın nəticəsində çəkisi 77 kiloqramdan 71 kiloqrama düşüb.

Həsənlinin vəkili Zibeydə Sadıqova iyulun 1-də onunla görüşdükdən sonra bildirib ki, müvəkkilinin səhhətində ciddi problemlər yaranıb, lakin buna baxmayaraq ona tibbi xidmət göstərilmir, həkim müayinəsi təşkil olunmur.

Vəkilin sözlərinə görə, Həsənlinin üzərindəki geyim dəyişdirilmir, köhnə və eyni paltarlarla saxlanılır. Eyni zamanda, həbsxanada sınıq çarpayıda yatması və gigiyenik şəraitin olmaması da onun səhhətinə mənfi təsir göstərir.

Ailəsinin bildirdiyinə görə, iki təcridxana əməkdaşı Həsənliyə qarşı zorakılıq tətbiq edib, paltarlarını cırıb və onu itələyərək ayağından xəsarət almasına səbəb olublar.


Ailəsi ilə görüşə icazə verilmir

Həsənli aclıq aksiyasını dayandırmaq niyyətində deyil. O, ailəsi ilə görüşə icazə verilmədiyini və bununla bağlı etiraz etdiyini bildirib. Eyni zamanda o, məhkəmə qərarı ilə Bakı İstintaq Təcridxanasında saxlanılmalı olduğu halda Umbakıya köçürülməsinə qarşı çıxır və öz hüquqlarının bərpasını tələb edir.


Qadın jurnalistlər də aclığa qoşula bilər

“AbzasMedia”nın Bakı İstintaq Təcridxanasında saxlanılan əməkdaşları – Sevinc Vaqifqızı, Nərgiz Absalamova və Elnarə Qasımova – bəyan ediblər ki, Həsənlinin tələbləri yerinə yetirilməzsə, onlar da aclq aksiyasına başlayacaqlar.


Rəsmi orqanlara müraciətlər cavabsız qalıb

Ülvi Həsənlinin vəkili məsələ ilə bağlı Penitensiar Xidmətə və Ombudsman Aparatına müraciət edib. Lakin indiyə qədər hər hansı reaksiya və ya araşdırma başlanıldığına dair məlumat verilmir.


“AbzasMedia”: Bu, insanlıq cinayətidir

“AbzasMedia” redaksiyası bu gün bəyanat yayaraq bildirib ki, Ülvi Həsənliyə qarşı tətbiq olunan münasibət fiziki və psixoloji işgəncə, qanunsuz cəza tədbiri və insanlıqdan kənar rəftar əlamətləri daşıyır:

“Ülvi Həsənliyə qarşı törədilən əməllər insanlıq cinayətidir. Azərbaycan bu cinayətlərin məsuliyyətindən beynəlxalq hüquq qarşısında boyun qaçıra bilməz.”

Redaksiya Prezident İlham Əliyevə, Ədliyyə naziri Fərid Əhmədova, Baş prokuror Kamran Əliyevə və Ombudsman Səbinə Əliyevaya təcili tədbir görülməsi üçün çağırış edib.

Xatırlatma

Ülvi Həsənli və “AbzasMedia”nın digər əməkdaşları 2023-cü ilin noyabrında həbs olunublar. İyunun 20-də Bakı Ağır Cinayətlər Məhkəməsinin çıxardığı hökmə əsasən, Həsənli və Sevinc Vaqifqızı da daxil olmaqla 7 nəfər jurnalist 7 ildən 9 ilədək azadlıqdan məhrum edilib.

Jurnalistlər ittihamları rədd edir, həbslərinin korrupsiya araşdırmaları ilə bağlı siyasi sifariş olduğunu bildirirlər. Hüquq müdafiə təşkilatları da bu həbsləri siyasi motivli hesab edir və jurnalistlərin dərhal azadlığa buraxılmasını tələb edir.