USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
CPJ aclıq edən Ülvi Həsənli ilə bağlı bəyanat yaydı
Jurnalistləri Müdafiə Komitəsi (CPJ) həbsdə aclıq edən “AbzasMedia”nın direktoru Ülvi Həsənli ilə bağlı bəyanat yayıb. Bəyanatda onun saxlanıldığı Umbakı həbsxanasında kobud rəftara və hüquq pozuntularına məruz qalması ciddi narahatlıq doğuran hal kimi qiymətləndirilib.
Təşkilat bildirib ki, Ülvi Həsənli və onun həmkarları dərhal azadlığa buraxılmalıdır.
Ülvi Həsənli iyunun 26-dan etibarən aclıq aksiyasına başladığını və cərimə kamerasında saxlanıldığını vəkilinə — Zibeydə Sadıqovaya iyulun 1-də keçirilən görüşdə bildirib. O, 1 saylı Bakı İstintaq Təcridxanasından qanunsuz şəkildə Umbakı həbsxanasına köçürüldüyünü deyib.
Elə həmin gün “AbzasMedia” rəhbərliyi də bəyanat yayaraq, Prezident İlham Əliyev, Ədliyyə naziri Fərid Əhmədov, Baş prokuror Kamran Əliyev və Ombudsman Səbinə Əliyevadan məsələni nəzarətə götürməyi tələb edib.
2025-ci il iyunun 20-də Bakı Ağır Cinayətlər Məhkəməsində keçirilən prosesdə Ülvi Həsənli və həmkarlarına uzunmüddətli həbs cəzaları verilib. Hökmə əsasən:
• Ülvi Həsənli, Sevinc Vaqifqızı, Hafiz Babalı və Fərid Mehralızadə – 9 il
• Nərgiz Absalamova və Elnarə Qasımova – 8 il
• Məhəmməd Kekalov – 7 il 6 ay azadlıqdan məhrum ediliblər.
“AbzasMedia” əməkdaşları ittihamları qəbul etmir, həbslərin korrupsiya araşdırmaları ilə bağlı sifarişli siyasi motivli olduğunu bildirirlər.
Yerli və beynəlxalq hüquq müdafiə təşkilatları da jurnalistlərin həbsini siyasi motivli sayır və onların dərhal azad edilməsinə çağırırlar.
