Rusiyada qiyabi olaraq 11 il müddətinə azadlıqdan məhrum edilmiş tanınmış video-bloger və jurnalist Maykl Naki, Rusiya ilə Azərbaycan arasında son günlərdə yaşanan gərginliyi təhlil edən analitik video yayımlayıb. Onun bu mövzuya həsr etdiyi videomaterialda Azərbaycan müxalifətinin fikirlərinə də yer verilib.

YouTube platformasında 2 milyondan çox izləyicisi olan Maykl Naki Putin rejiminin imperialist siyasətinə qarşı çıxışı və Ukraynanın haqlı mübarizəsinə dəstəyi ilə tanınır. Hazırda xaricdə yaşayan jurnalist demokratik qüvvələrin fəal tərəfdarlarından biridir.

Sözügedən videoda Naki Azərbaycan Xalq Cəbhəsi Partiyasının sədri Əli Kərimlinin son paylaşımına istinad edərək, Rusiya tərəfindən Azərbaycan xalqına qarşı aparılan münasibətin siyasi mahiyyətini qabardır. Videoçarxın 10:45-ci dəqiqəsində Naki belə deyir:

“Azərbaycanın müxalif Xalq Cəbhəsi Partiyasının lideri Əli Kərimli yazıb ki, tərəfdaş dövlətə və onun xalqına qarşı bu miqyaslı zorakılıq yalnız şəxsən Putinin göstərişi ilə ola bilərdi. Onun fikrincə, imperiya ambisiyalarının əsiri olan Kreml Azərbaycanı bir dövlət və xalq olaraq şüurlu şəkildə təhqir etmək istəyib. Çünki Rusiya Azərbaycanı müttəfiq və tərəfdaş kimi yox, məhz ondan asılı olan vassal kimi görmək istəyir. Moskva Azərbaycanı tam olaraq özünə tabe etmək istəyir. Putinin düşüncə tərzinə bərabərhüquqluluq anlayışı ziddir…”

Siyasi kontekstdə mühüm çıxış

Maykl Nakinin bu çıxışı Rusiya ilə Azərbaycan arasında diplomatik gərginliyin artdığı bir dövrə təsadüf edir. Xatırladaq ki, Yekaterinburqda iki azərbaycanlının öldürülməsindən sonra başlayan böhranın fonunda, son günlərdə Rusiya və Azərbaycan qarşılıqlı nota mübadiləsi, jurnalist və vətəndaşların saxlanılması, zorakılıq iddiaları ilə gündəmə gəlib.



Əli Kərimlinin istinad olunan fikirləri sosial şəbəkələrdə və siyasi dairələrdə rezonans doğurub, Moskvanın bölgədəki təsir dairəsi və Azərbaycanla münasibətlərindəki dominant yanaşması ətrafında müzakirələri dərinləşdirib.