USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Jurnalist Ramin Deko yenə həbsdə qaldı
İyulun 9-da Bakı Apellyasiya Məhkəməsi “Meydan TV işi” üzrə həbs olunan jurnalist Ramin Dekonun (Cəbrayılzadə) apellyasiya şikayətinə baxıb. O, barəsində seçilmiş həbs qətimkan tədbirinin uzadılmasına etiraz edirdi. Lakin hakim Əli Məmmədovun sədrliyi ilə keçirilən iclasda vəsatət təmin edilməyib.
Ramin Deko iyunun 24-də həbs müddəti daha 3 ay uzadılan jurnalistlərdən biridir. Eyni qərar Aynur Elgünəş, Aytac Tapdıq, Aysel Umudova, Xəyalə Ağayeva, Natiq Cavadlı, Şəmşad Ağa, Fatimə Mövlamlı, Ülviyyə Əli, Nurlan Libre və vətəndaş cəmiyyəti fəalı Ülvi Tahirov üçün də verilib. Onların hamısı bu qərardan apellyasiya şikayəti versələr də, indiyə qədər keçirilən məhkəmələrdə vəsatətlər rədd olunub.
Jurnalistlərə qarşı Cinayət Məcəlləsinin 206.3.2-ci maddəsi (qaçaqmalçılıq – qabaqcadan əlbir olan bir qrup şəxs tərəfindən törədildikdə) ilə ittiham irəli sürülüb. Onlar ittihamı qəbul etmir, həbslərini peşə fəaliyyətlərinə, xüsusən də tənqidi jurnalistikaya bağlayırlar.
Ramin Deko və digərləri ötən ilin dekabrından etibarən ardıcıl olaraq saxlanılıb. Saxlanılanlar arasında “Meydan TV” ilə yanaşı, digər media qurumlarının əməkdaşları və jurnalistlərlə əlaqəsi olmayan fəallar da var.
Hazırda oxşar ittihamlarla 30-a yaxın jurnalist və ictimai fəal həbsdə saxlanılır. Beynəlxalq insan hüquqları təşkilatları və Qərb ölkələrinin rəsmiləri Azərbaycan hakimiyyətini bu şəxsləri azad etməyə çağırır. Rəsmi Bakı isə ölkədə siyasi motivli həbslərin olmadığını iddia edir.
