“Abzas Media”nın həbsdə olan qadın jurnalistləri təşkilatın direktoru Ülvi Həsənlinin Bakı İstintaq Təcridxanasına (BİT) geri qaytarılmasını tələb edirlər. Onların sözlərinə görə, Həsənlinin BİT-ə köçürüləcəyi ilə bağlı verilmiş vədlər yerinə yetirilmir və təcridxana rəhbərliyi bunun əvəzində başqa “variantlar” təklif edir.

Bu barədə məlumatı “Abzas Media”ya jurnalistlərin yaxınları verib.

Məlumata əsasən, Bakı İstintaq Təcridxanasının rəisi Elnur İsmayılov qurumun həbsdəki əməkdaşı Nərgiz Absalamovaya bildirib ki, Ülvi Həsənli “Apellyasiya Məhkəməsinə qədər sentrala – Penitensiar Xidmətin Müalicə Müəssisəsinə köçürülə bilər” və oradakı şəraitin daha yaxşı olduğunu deyib. O əlavə edib ki, vəkillər Apellyasiya Məhkəməsində vəsatət verərlərsə, Həsənli “sentraldan” BİT-ə qaytarıla bilər.

Lakin “Abzas Media”nın baş redaktoru Sevinc Vaqifqızı bu təklifi rədd etdiklərini və buna razı olmadıqlarını bildirib:

“Biz tələb edirik, xahiş etmirik. Ülvi qanunsuz aparılıb və geri qaytarılmalıdır. ‘Sentral’ müalicə müəssisəsidir və orada xəstəliyi olan məhbuslar müalicə almalıdır. Ülvinin müalicəyə ehtiyacı yoxdur. Ehtiyacı olan birinin yerinə Ülvini yerləşdirmək, həmin məhbusun hüququnu pozmaqdır. Biz buna razı ola bilmərik. Rəisdən istəyimiz də odur ki, vəzifəsindən sui-istifadə etməsin və qanunsuz ‘xahişlər’ etməsin.”

Xatırladaq ki, 20 iyun 2025-ci il tarixində Bakı Ağır Cinayətlər Məhkəməsi “Abzas Media işi” üzrə 7-9 il azadlıqdan məhrumetmə cəzaları çıxarıb. Hökm çıxarıldıqdan sonra Ülvi Həsənli və digər kişi jurnalistlər BİT-dən Umbakıdakı Penitensiar Kompleksə köçürülüblər.

Yeni həbsxanada Ülvi Həsənliyə qarşı zorakılıq tətbiq edildiyi, onun ailəsi ilə – həyat yoldaşı və azyaşlı qızı ilə görüşə icazə verilmədiyi bildirilir. Bu şəraitə etiraz olaraq Həsənli 9 gün aclıq aksiyası keçirib. Onun bu addımına həm “Abzas Media”nın qadın əməkdaşları – Sevinc Vaqifqızı, Nərgiz Absalamova, Elnarə Qasımova, həm də “Meydan TV işi” üzrə həbs edilən jurnalistlər – Aynur Elgünəş, Aytac Tapdıq, Xəyalə Ağayeva və Aysel Umudova da qoşulublar.

İyulun 20-də Ülvi Həsənli aclıq aksiyasını bərpa etdiyini bildirib. O, əvvəlki vədlərin yerinə yetirilmədiyini əsas gətirərək bu dəfə müddətsiz aclığa başladığını açıqlayıb.