Həbsdə olan “Abzas Media” əməkdaşları başladığı aclıq aksiyasını dayandırıb. Bu barədə məlumatı onların ailə üzvləri və yaxınları iyulun 4-də açıqlayıb.

Məlumata görə, 9 gündür aclıq edən “Abzas Media”nın direktoru Ülvi Həsənli ailəsi ilə telefon danışığında aksiyanı dayandırdığını bildirib. Həsənli bu qərarı həmrəy olaraq aclığa başlayan qadın jurnalistlərin səhhətindən narahat olması ilə əsaslandırıb.

Bunun ardınca “Abzas Media”nın digər həbsdə olan əməkdaşları – Sevinc Vaqifqızı, Nərgiz Absalamova və Elnarə Qasımova da aclıq aksiyasını dayandırdıqlarını bildiriblər. Onların 3 gündür aclıqda olduqları qeyd olunur.

Ülvi Həsənli aclıq aksiyasına iyunun 26-da başladığını və həmin gündən Bakı İstintaq Təcridxanasında cərimə kamerasına (karserə) salındığını vəkilinə bildirmişdi. O, həyat yoldaşı və iki yaşlı qızı ilə görüş hüququnun pozulmasına, həmçinin hökm hələ qanuni qüvvəyə minmədən Umbakı Təcridxanasına köçürülməsinə etiraz olaraq aclığa başlamışdı.

Aclıq aksiyasına həmrəy olaraq “Meydan TV” işi üzrə həbsdə olan jurnalistlər – Aynur Elgünəş (Qəmbərova), Aytac Tapdıq (Əhmədova), Xəyalə Ağayeva və Aysel Umudova da aclığa qoşulmuşdu.

Məhkəmə hökmləri

İyunun 20-də Bakı Ağır Cinayətlər Məhkəməsində “Abzas Media işi” üzrə hökm oxunub. Məhkəmənin qərarı ilə:
• Ülvi Həsənli (direktor)
• Sevinc Vaqifqızı (baş redaktor)
• Hafiz Babalı (araşdırmaçı jurnalist)
• Fərid Mehralızadə (iqtisadçı, “Azadlıq Radiosu” əməkdaşı) — 9 il
• Nərgiz Absalamova və Elnarə Qasımova — 8 il
• Məhəmməd Kekalov (koordinator) — 7 il 6 ay azadlıqdan məhrum ediliblər.

“Meydan TV işi” üzrə həbslər

2023-cü ilin dekabrında “Meydan TV işi” çərçivəsində də bir sıra jurnalistlər həbs edilib. Onların arasında saytın Azərbaycan nümayəndəliyinin rəhbəri Aynur Elgünəş, jurnalistlər Aysel Umudova, Aytac Tapdıq, Xəyalə Ağayeva, Ramin Cəbrayılzadə, Natiq Cavadlı və vətəndaş cəmiyyəti fəalı Ülvi Tahirov var.

Sonradan “Arqument.az” saytının baş redaktoru Şəmşad Ağa, jurnalistlər Nurlan Libre, Fatimə Mövlamlı və Ülviyyə Əli də bu iş üzrə saxlanılıb.

Saxlanılan jurnalistlər onlara qarşı irəli sürülən ittihamları rədd edir və həbslərinin peşə fəaliyyətləri ilə bağlı olduğunu bildirirlər. Onların müdafiəçiləri və yerli, beynəlxalq hüquq müdafiə təşkilatları bu həbsləri söz və mətbuat azadlığına zidd addımlar kimi qiymətləndirir.