USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Aclıq edən “Abzas Media”nın qadın jurnalistlərinə təcridxanada təzyiq göstərilir
“Abzas Media”nın həbsdə olan qadın jurnalistləri — Sevinc Vaqifqızı, Nərgiz Absalamova və Elnarə Qasımova Bakı İstintaq Təcridxanasında keçirdikləri aclıq aksiyasına görə təzyiqlə üzləşdiklərini bildirirlər. Bu barədə məlumatı onların yaxınları “Abzas Media”ya verib.
Məlumata görə, artıq üç gündür aclıq edən və ayrı kameralarda saxlanılan jurnalistlər qeyd ediblər ki, təcridxana rəhbərliyi isti və soyuq suyun verilməsində süni maneələr yaradıb. Belə ki, adi vaxtlarda müəyyən edilmiş rejimə uyğun verilən isti və soyuq su bu dəfə qarışıq şəkildə, yəni isti su zamanı soyuq, soyuq su zamanı isə isti formada təqdim olunub. Bu vəziyyət digər qadın məhbuslar arasında da narazılığa səbəb olub.
Etirazlara cavab olaraq təcridxana əməkdaşlarının digər məhbuslara “Sevincgil aclıq edir deyə” bu dəyişikliklərin tətbiq olunduğunu dediyi bildirilir. Jurnalistlərin sözlərinə görə, bu tədbirlər onların aksiyasına cavab olaraq rəhbərlik tərəfindən həyata keçirilən psixoloji təzyiq formasıdır və bu, həm də digər məhbuslarla münasibətlərinə mənfi təsir göstərib.
Həbsdəki qadın jurnalistlər aclıq aksiyasını davam etdirmək niyyətində olduqlarını bildiriblər.
Sevinc Vaqifqızı, Nərgiz Absalamova və Elnarə Qasımova iyulun 22-də, “Abzas Media”nın həbsdəki direktoru Ülvi Həsənlinin Bakı İstintaq Təcridxanasına geri qaytarılması tələbilə başladığı aclıq aksiyasına qoşulublar. Aksiyadan sonra onlar öz kameralarından çıxarılaraq ayrı otaqlarda yerləşdiriliblər. Bu zaman Nərgiz Absalamovanın zorakılığa məruz qaldığı bildirilir.
Ülvi Həsənli isə iyulun 20-dən etibarən aclıq aksiyasına başlayıb və hazırda cərimə kamerasında saxlanılır. Ailəsinin sözlərinə görə, o, yeni həbsxanada zorakılığa məruz qalıb və həyat yoldaşı ilə görüş hüququndan məhrum edilib. Həsənli aclıq aksiyasını ona vəd olunduğu halda Bakı İstintaq Təcridxanasına köçürülmədiyi üçün yenidən başladığını açıqlayıb.
