“Abzas Media”nın həbsdə olan qadın əməkdaşları Sevinc Vaqifqızı, Elnarə Qasımova və Nərgiz Absalamova aclıq aksiyasına görə Bakı İstintaq Təcridxanasında qeyri-insani və alçaldıcı rəftarla üzləşdiklərini bildiriblər. Bu barədə məlumatı onların yaxınları verib.

Jurnalistlər iyulun 22-də nəşrin direktoru Ülvi Həsənlinin başladığı aclıq aksiyasına qoşulublar. Ülvi Həsənli iyulun 20-də vəd olunmasına baxmayaraq Bakı İstintaq Təcridxanasına qaytarılmadığı və Umbakı Penitensiar Kompleksində qeyri-insani rəftarla üzləşdiyi üçün müddətsiz aclıq elan etmişdi.

Jurnalistlərin sözlərinə görə, aksiyaya başlamazdan əvvəl onlar təcridxana rəisi Elnur İsmayılova rəsmi ərizə ilə müraciət edərək aclığa başlayacaqlarını bildiriblər. Lakin ertəsi gün onlar əvvəlcə rəis müavini Əhəd Abdıyevin otağında yarım saatdan çox gözlədilib, daha sonra isə onlara bildirilib ki, Penitensiar Xidmətdən gələn nümayəndələr onlarla görüşməkdən imtina edərək müəssisəni tərk ediblər.

Bundan sonra üç qadın jurnalist təcrid edilərək ayrı-ayrılıqda, antisanitar şəraitdəki otaqlara yerləşdiriliblər. Onların sözlərinə görə, qaldıqları otaqlarda duş yoxdur, pəncərələrin şüşələri çıxarılmayıb, havalandırma sistemi isə işləmir. Otaqların çirkli olduğu və onlara təmizlik üçün kömək göstərilmədiyi də qeyd edilib.

Jurnalistlərdən biri – Nərgiz Absalamova otağından çıxmaqdan imtina etdikdə, rəis müavini Əhəd Abdıyev tərəfindən zorakılığa məruz qalıb. Onun qollarında qançır izləri və sıyrıqlar qaldığı bildirilir.

Qadın jurnalistlər təzyiqlərin məqsədinin onları aclıq aksiyasından vaz keçirməyə yönəldiyini qeyd ediblər. “Ülvi təcrübxanaya qaytarılmayınca aclığı dayandırmayacağıq”, – deyə onlar bildiriblər.

Xatırladaq ki, iyunun 20-də Bakı Ağır Cinayətlər Məhkəməsi “Abzas Media işi” üzrə jurnalistlərə 7,5 ildən 9 ilədək həbs cəzası verib. Hökm elan edildikdən sonra Ülvi Həsənli və digər kişi jurnalistlər Umbakıdakı yeni Penitensiar Kompleksə köçürülüblər. Həsənlinin həyat yoldaşı və azyaşlı övladı ilə görüş hüququnun məhdudlaşdırıldığı, ona qarşı fiziki təzyiq göstərildiyi iddia olunur.

Aclıq aksiyasına “Meydan TV işi” üzrə həbsdə olan qadın jurnalistlər – Aynur Elgünəş, Aytac Tapdıq, Xəyalə Ağayeva və Aysel Umudova da qoşulublar.

Hüquq müdafiəçiləri bu rəftarları beynəlxalq normalara zidd hesab edir və Azərbaycan hökumətini jurnalistlərin hüquqlarını təmin etməyə çağırır. Azərbaycan rəsmiləri isə həbslərin siyasi motivli olduğunu və ya qeyri-insani rəftarların baş verdiyini inkar edir.