USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Həbsdəki qadın jurnalistlər Ülvi Həsənlinin aclıq aksiyasına qoşulurlar
“Abzas Media”nın həbsdə olan direktoru Ülvi Həsənlinin müddətsiz aclıq aksiyasına nəşrin qadın əməkdaşları da qoşulublar. Bu barədə “Abzas Media”nın həbsdəki baş redaktoru Sevinc Vaqifqızı ailəsinə məlumat verib.
Onun sözlərinə görə, iyulun 22-dən etibarən Sevinc Vaqifqızı, Nərgiz Absalamova və Elnarə Qasımova müddətsiz aclığa başlayıblar. Onlar Ülvi Həsənlinin Bakı İstintaq Təcridxanasına geri qaytarılmasını tələb edirlər.
İyulun 20-də Ülvi Həsənli aclıq aksiyasına başladığını elan edib. O, ictimaiyyətə müraciətində bildirib ki, aclığı bərpa etməsinin səbəbi vəd edildiyi halda hələ də Bakı İstintaq Təcridxanasına köçürülməməsidir.
Xatırladaq ki, iyunun 20-də Bakı Ağır Cinayətlər Məhkəməsi “Abzas Media işi” üzrə həbs edilən şəxslər barəsində 7 ildən 9 ilə qədər azadlıqdan məhrumetmə qərarları çıxarıb. Hökm çıxarıldıqdan sonra kişi jurnalistlər Bakı İstintaq Təcridxanasından Umbakıdakı Penitensiar Kompleksə köçürülüblər.
Yeni həbsxanada Ülvi Həsənlinin zorakılığa məruz qaldığı, ailə üzvləri ilə görüş hüququndan məhrum edildiyi və cərimə kamerasına salındığı bildirilir. Bu səbəbdən o, daha əvvəl də 9 gün aclıq aksiyası keçirmişdi.
Ülvi Həsənlinin aclıq aksiyasına həmçinin digər jurnalistlər də dəstək veriblər. “Abzas Media” əməkdaşları ilə yanaşı, “Meydan TV işi” üzrə həbs edilən Aynur Elgünəş, Aytac Tapdıq, Xəyalə Ağayeva və Aysel Umudova da aclıq aksiyasına qoşulduqlarını bəyan ediblər.
Hazırda bu jurnalistlərin səhhəti və hüquqları ilə bağlı narahatlıqlar artır. Hüquq müdafiəçiləri və jurnalist təşkilatları məsələyə dərhal reaksiya verilməsini tələb edirlər.
