Özbəkistan hökuməti “Sea Breeze Uzbekistan” kurort layihəsinin rəsmi icrasına yaşıl işıq yandırıb. Nazirlər Kabinetinin 1 avqust 2025-ci il tarixli qərarına əsasən, Daşkənd vilayətinin Bostanlıq rayonunda, məşhur Çarvak su anbarının sahilində bütün mövsümlük istirahət kompleksinin inşasına başlanacaq.

Layihənin təşəbbüskarlarından biri Azərbaycanın tanınmış iş adamı və müğənnisi Emin Ağalarovun rəhbərlik etdiyi “Agalarov Development” şirkətidir. Məhz bu şirkətin iştirakı ilə yaradılmış “Sea Breeze Uzbekistan” MMC 577 hektarlıq ərazidə kurort kompleksinin inşası üçün ən yaxşı təklifin sahibi elan edilib.

Layihənin ümumi dəyəri 5 milyard dollar məbləğində qiymətləndirilir. Bu, Mərkəzi Asiyada bu miqyasda həyata keçiriləcək nadir turizm və infrastruktur təşəbbüslərindən biri hesab olunur. Kurort kompleksinin müasir otelləri, villaları, əyləncə və sağlamlıq mərkəzləri ilə regional turizmin inkişafına təkan verəcəyi gözlənilir.

Emin Ağalarov ötən il avqustun 28-də Azərbaycanda yerləşən “Sea Breeze” kurort şəhərinə 7 milyard dollar investisiya qoyulduğunu açıqlamışdı. Yeni Özbəkistan layihəsi isə bu təcrübənin regiona ixracı kimi qiymətləndirilir.

Layihənin inşasına nə zaman başlanacağı və istifadəyə verilmə tarixi hələ açıqlanmayıb.