Həbsdə olan iqtisadçı alim, keçmiş millət vəkili Nazim Bəydəmirlinin ailəsi onun səhhətinin kəskin şəkildə pisləşdiyini bildirir.

Avqustun 5-də həyat yoldaşını ziyarət edən Fəridə Bəydəmirlinin sözlərinə görə, sabiq deputatın üzünün rəngi qaralıb, halsızdır, dayanmadan tərləyir və danışmağa taqəti yoxdur.

“Həkimlərlə məsləhətləşib dərmanlar apardım – antibiotik, eyfulin, natrixlor və s. Ancaq bu, çox primitiv müalicədir. Sətəlcəmi olan xəstə xəstəxana şəraitində müalicə almalıdır, saturasiyası düşərsə, oksigen balonu ilə təmin olunmalıdır. Mənim gətirdiyim dərmanları həbsxanada tətbiq edəcək həkim yoxdur,” – deyə Fəridə Bəydəmirli bildirib.

O, məsul şəxslərə müraciət edərək həyat yoldaşının təcili xəstəxanaya köçürülməsini və normal tibbi yardım göstərilməsini tələb edib.

İttihamlar və məhkəmə qərarı

Nazim Bəydəmirli 2023-cü ilin iyulunda saxlanılıb. Ona qarşı Cinayət Məcəlləsinin 182.2.4 (hədə-qorxu ilə tələb etmə – xeyli miqdarda əmlak əldə etmək məqsədilə törədildikdə) və 182.2.2 (hədə-qorxu ilə tələb etmə – təkrar törədildikdə) maddələri ilə ittiham irəli sürülüb.

İttihama əsasən, o, “Avto-Qarant” ASC-nin təsisçisi Ədalət Bağırovu intim görüntülərlə şantaj edərək ondan 50 min manat tələb edib, nəticədə 10 min manat alıb. Digər iddiaya görə, 1996-cı ildə Rusiyanın Lipetsk şəhərində bir nəfərdən biznes payından imtina etməsini tələb edib.

Bəydəmirli ittihamları rədd edir və həbsi ekoloji fəaliyyətinə görə siyasi sifariş hesab edir. Onun sözlərinə görə, Söyüdlüdə sianid gölünün tikintisinə etiraz edən sakinlərə verdiyi dəstəyə görə şərlənib.

2024-cü ilin sentyabrında məhkəmə onu 8 il müddətinə azadlıqdan məhrum edib.