İsrailin Qəzza zolağına avqustun 10-u axşam saatlarında endirdiyi hücum nəticəsində “Al-Jazeera” telekanalının beş jurnalisti həlak olub. Hücum, Qəzza şəhərindəki Əl-Şifa xəstəxanası yaxınlığında qurulmuş çadırı hədəfə alıb. Ümumilikdə 7 nəfərin öldüyü hadisədə tanınmış müxbir Ənəs əl-Şərif də həyatını itirənlər arasında olub.

Əl-Şərif hücumdan az əvvəl “X” platformasında İsrailin Qəzzanın şərq və cənub hissələrinə qarşı “atəş kəmərləri” adlandırılan intensiv bombardman həyata keçirdiyini yazmışdı. Onun son paylaşdığı videoda güclü partlayışların gurultusu eşidilir, qaranlıq səma narıncı işıq saçan partlayışlarla işıqlanır.

Jurnalistin daha əvvəl, ölümündən sonra dərc olunması üçün yazdığı son mesajında bu sözlər yer alıb:

“Heç vaxt həqiqəti olduğu kimi çatdırmaqdan çəkinmədim. Uşaqlarımızın və qadınlarımızın parçalanmış cəsədləri belə onların ürəyini yumşaltmadı və xalqımızın bir ildən artıqdır məruz qaldığı qətliamı dayandırmadı.”

“Al-Jazeera” Media Şəbəkəsi qətlləri “mətbuat azadlığına qarşı açıq və planlaşdırılmış hücum” adlandırıb və beynəlxalq ictimaiyyəti “davam edən soyqırımı dayandırmaq, jurnalistlərin qəsdən hədəf alınmasına son qoymaq üçün qəti tədbirlər görməyə” çağırıb.

İsrail ordusu isə bəyanatında Əl-Şərifi HƏMAS-ın hücrəsinə rəhbərlik etməkdə və israillilərə qarşı raket hücumları təşkil etməkdə ittiham edib. Ordu iddia edib ki, jurnalistin Fələstin qruplaşması ilə əlaqəsini sübut edən sənədlər mövcuddur.