Bu gecə İsrail Hərbi Hava Qüvvələri İranın paytaxtı Tehrana və digər şəhərlərinə intensiv hava zərbələri endirməyə başlayıb.

Məlumata görə, Tehranın qərb hissəsində ardıcıl partlayış səsləri eşidilir. Şəhər səmasında hava hücumundan müdafiə sistemləri aktivləşdirilib. Şahidlər göydə bir neçə zenit raketinin və partlayışların işığını müşahidə etdiklərini bildiriblər.

Eyni zamanda, Təbriz, Buşəhr və Şiraz şəhərlərində də hava hücumundan müdafiə sistemlərinin işə salındığı qeyd olunur. İddialara görə, İsrail pilotsuz uçuş aparatları və qırıcıları bir neçə hərbi və strateji hədəfə yönəlib.

Hazırda İran rəsmiləri hücumlarla bağlı rəsmi açıqlama verməyiblər, lakin yerli media ordu qüvvələrinin tam hazırlıq vəziyyətinə gətirildiyini yazır.

Bu hücum, İsrailin yüksək rütbəli SEPAH komandirinin ölümündən və ABŞ-İran arasında artan gərginlikdən sonra həyata keçirilən ən genişmiqyaslı hərbi əməliyyat kimi qiymətləndirilir.

Hazırda regionda vəziyyət son dərəcə gərgin olaraq qalır. Gözləntilərə görə, qarşılıqlı cavab zərbələri və mümkün müharibə təhlükəsi Yaxın Şərqdə sabitliyi ciddi şəkildə sarsıda bilər.