Avqustun 19-da Bakı Apellyasiya Məhkəməsində iqtisadçı alim, İstanbul Universitetinin doktorantı Fazil Qasımovun işi üzrə növbəti məhkəmə prosesi keçirilib. Prosesə hakim Aqil Musayev sədrlik edib.

Məhkəmədə Fazil Qasımov vəkili Nemət Kərimlidən imtina edib. Bu barədə Meydan TV-yə onun qardaşı Nazim Qasımov məlumat verib. O bildirib ki, vəkil müdafiə funksiyasını yerinə yetirmədiyi üçün qardaşı ondan imtina etmək məcburiyyətində qalıb:

“Məhkəmənin sonuna yaxın Fazil Nemət Kərimlidən imtina elədi. Səbəb odur ki, ona heç bir hüquqi yardım göstərmir, müdafiə etmir. Məhkəmədə vəkilə beş dəqiqəlik Fazillə ünsiyyət yaratmaq üçün vaxt verildi, onda da Nemət Kərimli telefonu götürüb çölə çıxdı. Digər səbəblər də var. Martın sonlarında biz Nemət müəllimlə müqavilə bağlamışdıq. O, yalnız bir dəfə Fazilin yanına gedib, o da çox xahişdən sonra. Sonuncu dəfə avqustun 14-də Apellyasiya Məhkəməsinə dəvət olunub, amma orada da konfidensial görüş olmayıb. Buna görə də Fazil avqustun 19-da ondan imtina etdi”.

Nemət Kərimli isə Meydan TV-yə açıqlamasında bu barədə danışmaq istəmədiyini qeyd edib.

“Vəziyyəti çox ağırdır”

Nazim Qasımov qardaşının səhhətindən narahat olduğunu deyib:

“İndi onu Şüvəlana, 3 saylı cəzaçəkmə müəssisəsinə köçürürlər. Vəziyyəti çox ağırdır, səhhəti pisdir, çox gərginliklər keçirir”.

Fazil Qasımov məhkəmədə dövlət hesabına vəkillə təmin olunması barədə vəsatət qaldırıb. Qardaşının sözlərinə görə, onlar vəkil olaraq Fəxrəddin Mehdiyevi istəsələr də, o, Qubad İbadoğlunun müdafiəçisi olduğundan bu işə qoşula bilmir.

“Bizim öz hesabımıza vəkil tutmaq imkanımız yoxdur. Maddi durumumuz çox acınacaqlıdır. Məcburuq dövlətdən vəkil istəməyə. Fazil məhkəmədə təqsirsizliyini sübut edən sənədləri hakimə təqdim etdi, vəsatətlər verdi, amma qəbul olunmadı. Ümumilikdə 4 vəsatət təqdim olunub, heç biri təmin edilməyib”.

Növbəti məhkəmə prosesi avqustun 25-nə təyin edilib.

İttiham və hökm

Fazil Qasımov 2023-cü ildə iqtisadçı Qubad İbadoğlunun işi ilə bağlı Türkiyədə saxlanılaraq Azərbaycana gətirilib. 2025-ci il martın 13-də məhkəmə onu 9 il müddətinə azadlıqdan məhrum edib.

O, Cinayət Məcəlləsinin 204.3.1-ci maddəsi (saxta pul və ya qiymətli kağızlar hazırlama, əldə etmə və ya satma mütəşəkkil dəstə tərəfindən törədildikdə) ilə ittiham olunur. Lakin Qasımov özünü təqsirli bilmir və irəli sürülən ittihamların əsassız olduğunu deyir.