Avqustun 6-da Bakı Apellyasiya Məhkəməsində iqtisadçı Fazil Qasımovun şikayəti üzrə məhkəmə prosesi keçirilib. Məhkəmə onun dövlət hesabına vəkillə təmin olunması barədə vəsatətini təmin etməyib. Bu barədə Toplum TV-yə Qasımovun ailə üzvləri məlumat veriblər.

Yaxınlarının sözlərinə görə, iclas zamanı Fazil Qasımov vəkili Nemət Kərimliyə bəzi sənədləri təqdim etmək istəsə də, konvoy əməkdaşları həmin sənədləri ondan alıb və hakim də onların vəkilə verilməsinə icazə verməyib. Qasımov buna etiraz edərək, bu müdaxilənin hüquqi əsası olmadığını bildirib.

Məhkəmədə Qasımov vəkilindən imtina etdiyini və artıq 90 gündür onunla əlaqə qura bilmədiyini bildirib. Onun sözlərinə görə, nə vəkili görüşə gəlib, nə də Penitensiar Xidmət bu əlaqənin qurulmasına şərait yaradıb. Qasımov Nemət Kərimlinin onun hüquqi müdafiəsi ilə maraqlanmadığını deyərək, yeni vəkilin dövlət hesabına təyin olunmasını istəyib. Ailəsinin maddi imkanı olmadığını da qeyd edib.

Qasımov həmçinin müdafiə hüququnun pozulduğunu deyərək aclıq aksiyasına başladığını elan edib. O bildirib ki, artıq üç gündür qida qəbul etmir və bu gündən etibarən su da içməyəcək.

Vəkil Nemət Kərimli təqsirləndirilən şəxsin vəkildən imtina etmək hüququ olduğunu təsdiqləyib və vəsatətin təmin olunmamasını qanun pozuntusu adlandıraraq məhkəmə tərkibinə etiraz edib. Lakin hakim bu vəsatəti təmin etməyib. O, vəkilin təqsirləndirilən şəxslə görüşməməsinin vəkil dəyişikliyi üçün hüquqi əsas sayılmadığını bildirib. Hakimin sözlərinə görə, Qasımovun vəkili ilə konfidensial görüşməsi üçün ayrıca vaxt ayrılacaq.

Növbəti məhkəmə iclası avqustun 19-u saat 16:00-a təyin edilib.

Fazil Qasımov mayın 21-dən başlayaraq azadlığa buraxılması tələbi ilə təxminən iki ay aclıq aksiyası keçirmiş və iyunun 17-də aksiyanı dayandırmışdı.

Qubad İbadoğlunun işi ilə əlaqədar 2023-cü ildə Türkiyədə saxlanılaraq Azərbaycana gətirilən Fazil Qasımov bu ilin martında 9 il azadlıqdan məhrum edilib. O, Cinayət Məcəlləsinin mütəşəkkil dəstə tərəfindən satış məqsədilə saxta pul və ya valyuta əldə etmə və ya satma maddəsi ilə ittiham olunur. Qasımov ittihamı qəbul etmir.

Qubad İbadoğlu isə 2023-cü ilin iyulunda həbs edilib. Ona qarşı irəli sürülən ittihamlar arasında satış məqsədilə saxta valyuta əldə etmə və ya satma, həmçinin dini ekstremist materialların hazırlanması və yayılması da yer alır. O da öz növbəsində bütün ittihamları rədd edir. 2024-cü ilin aprelində ev dustaqlığına buraxılan İbadoğlunun qətimkan tədbiri daha sonra dəyişdirilərək polis nəzarətinə verilib.