İyulun 29-da Bakı Apellyasiya Məhkəməsində iqtisadçı Fazil Qasımovun şikayəti üzrə keçirilən məhkəmə iclasında o, Penitensiar Xidmətin əməkdaşları tərəfindən zorakılığa məruz qaldığını deyib. Bu barədə məlumatı onun ailə üzvləri verib.

Qasımov məhkəmədə bildirib ki, artıq 42 gündür vəkili Nemət Kərimli ilə əlaqə saxlaya bilmir. Bu səbəbdən vəkili ilə konfidensial şəkildə danışmaq üçün məhkəmədən vaxt istəyib. Hakim onlara cəmi 5 dəqiqəlik fasilə verib.

Ailə üzvlərinin sözlərinə görə, fasilə zamanı Fazil Qasımov sənədlərini vəkilinə təqdim etmək istədikdə, konvoy əməkdaşları həmin sənədləri əlindən alaraq otaqdan çıxıb. Daha sonra geri qayıdaraq sənədləri birbaşa hakimin özünə təqdim ediblər. Qasımov bu halın qanunsuz olduğunu bildirib və sənədlərin vəkilinə qaytarılmasını tələb edib. Nəticədə sənədlər vəkilə təqdim olunub. Lakin vəkilin öz sənədlərini Qasımova verməsinə hakim icazə verməyib.

Daha ciddi iddia isə Qasımovun məhkəməyə gətirilməzdən əvvəl saxlanıldığı Umbakıdakı cəzaçəkmə müəssisəsində Penitensiar Xidmətin əməkdaşları tərəfindən fiziki zorakılığa məruz qalması ilə bağlıdır. Onun sözlərinə görə, apellyasiya şikayətinə əlavələrin qaytarılmasını istədikdə iki əməkdaş onu arxadan tutub, rəis müavini Ramin adlı şəxs isə onun üzünə iki şillə vurub və boğazından tutaraq boğub. Həmin şəxs Qasımova “Sən cinayətkarsan, biz cinayətkarlarla belə davranırıq” deyib.

İqtisadçı bildirib ki, bu səbəbdən həm fiziki, həm də psixoloji cəhətdən özünü çox pis hiss edir və tibbi yardıma ehtiyac duyur. O, məhkəmə iclasının təxirə salınmasını istəyib və hakim bu tələbi qəbul edərək iclası avqustun 6-na təxirə salıb.

Fazil Qasımov 2023-cü ildə Qubad İbadoğlunun işi ilə bağlı Türkiyədə saxlanılaraq Azərbaycana ekstradisiya edilib. Bu il mart ayında isə o, saxta pul hazırlama və satma ittihamı ilə 9 il müddətinə azadlıqdan məhrum edilib. Qasımov ittihamları qəbul etmir.

Qeyd edək ki, o, mayın 21-dən başlayaraq təxminən iki ay müddətində azadlığa buraxılması tələbi ilə aclıq aksiyası keçirib və iyunun 17-də aksiyanı dayandırıb.

Qubad İbadoğlu isə ötən ilin iyulunda həbs olunub və ona qarşı da saxta valyuta və dini ekstremist materiallarla bağlı ittihamlar irəli sürülüb. O da bu ittihamları rədd edir. 2024-cü ilin aprelində ev dustaqlığına buraxılan İbadoğlu, may ayında isə polis nəzarətinə verilib.