Müsavat Partiyasının və Milli Şuranın həbsdə olan üzvü Tofiq Yaqublunun vəkili Nemət Kərimli Penitensiar Xidmətin Müalicə Müəssisəsində qanunsuz məhdudiyyətlərlə üzləşdiyini bildirir. Bu barədə siyasətçinin qızı Nigar Həzi məlumat yayıb.

Onun sözlərinə görə, vəkil müvəkkili ilə görüşə gedərkən apardığı bütün sənədlər müəssisə əməkdaşları tərəfindən xüsusi yoxlamadan, senzuradan keçirilir. Yalnız “uyğun” hesab edilən sənədlərin görüş otağına buraxılması vəkil–müvəkkil arasındakı konfidensiallığı ciddi şəkildə pozur.

“Keçən həftə cümə günü Nemət Kərimli Tofiq Yaqublunun 2013-cü ildəki saxta cinayət işi ilə bağlı AİHM-də kommunikasiya mərhələsinin müzakirəsi üçün görüşə gedib. Lakin qanunsuz yoxlamalara etiraz olaraq bu dəfə görüşdən imtina edib”, – Nigar Həzi bildirib.

“Abzas Media”ya danışan vəkil Nemət Kərimli də müəssisədə aparılan yoxlamaların qanunsuz olduğunu təsdiqləyib. Onun sözlərinə görə, sənədlərin məzmunu ilə tanış olunması, yaxud vəkilin üzərində axtarış aparılması nə Azərbaycan qanunvericiliyinə, nə də Avropa İnsan Hüquqları Konvensiyasına uyğundur.

Vəkil məsələ ilə bağlı Baş Prokurorluğa, Nizami rayon prokurorluğuna və Penitensiar Xidmətə şikayətlər ünvanladığını bildirib. O həmçinin Avropa İnsan Hüquqları Konvensiyasının 34-cü maddəsinə əsaslanaraq Avropa Məhkəməsinə də müraciət hazırladığını qeyd edib.

Xatırladaq ki, Tofiq Yaqublu 2023-cü ilin dekabrında həbs olunub. Martın 10-da Bakı Ağır Cinayətlər Məhkəməsi onu dələduzluqda və saxta sənəd hazırlamaqda təqsirli bilib, 9 il azadlıqdan məhrum edib. Müxalif siyasətçi uzun illər Əliyevlər ailəsinin siyasətini sərt tənqid etdiyi üçün dəfələrlə həbs olunub və beynəlxalq təşkilatlar tərəfindən vicdan məhbusu kimi tanınıb.