"Tanınmış hüquqşünas, vəkilim Fəxrəddin Mehdiyevin başına gələnlərdən və gətirilənlərdən çox narahat oldum.

Avqustun 23-də Lənkərandan Bakıya gələrkən Fəxrəddin bəyin oğlu Vüsalın idarə etdiyi avtomobil arxadan vurulub. Maşında olan Fəxrəddin bəy və ailə üzvləri yüngül xəsarətlər alıblar. Ancaq onların bu qəzadan yüngül xəsarətlərlə ötüşməsi daha çox Fəxrəddin bəyin oğlu Vüsalın maşını yüksək peşəkarlıqla idarə etməsi sayəsində mümkün olub.

Xatırladım ki, Fəxrəddin bəy vəkillik fəaliyyətindən əvvəl özü xeyli müddət istintaqda çalışıb. Qəzanın təfərrüatlarını araşdırdıqdan sonra o bu qənaətə gəlib ki, avtomobil qəzası böyük ehtimalla təsadüfi qəza deyil.

Dostlar, xatırladım ki, Fəxrəddin bəy məndən əlavə ictimai - siyasi xadimlərdən siyasi məhbuslar Tofiq Yaqublunun, Qubad İbadoğlunun, Azər Qasımlının, Tale Bağırzadənin, Ülvi Həsənlinin, Rüfət Səfərovun, Ələsgər Məmmədlinin, Əvəz Zeynallının, Şəmşad Ağanın, Hacı Vəliyevin, Emin İbrahimovun, AXCP funksionerləri Əlizamin Salayevin, Niyaməddin Əhmədovun və digər çoxsaylı siyasi məhbusların da vəkilidir.

Qətiyyən təsadüfi deyil ki, Vəkillər Kollegiyasının İntizam Komissiyası rəy verib ki, Fəxrəddin bəy mətbuatda gedən yazıları siyasi məhbus Tofiq Yaqubluya çatdırmaqla (?) guya qaydaları pozub. Vəkillər Kollegiyası Rəyasət Heyətinin Fəxrəddin Mehdiyevlə bağlı məsələyə baxacağı gözlənilir.

Dostlar, bir vəkilin öz həbsdə olan müvəkkilinə mətbuatda gedən məlumatları çatdırmasından təbii nə ola bilər? Heç şübhəsizdir ki, bu uydurulmuş "qayda pozuntusu" iddiası Fəxrəddin bəyin peşə fəaliyyətinə görə məruz qaldığı təzyiqdir.

Fəxrəddin bəyin vicdanlı və peşəkar vəkil fəaliyyətinə görə onsuz da təzyiq altında olduğu bir vaxtda, üstəlik də şübhəli avtomobil qəzasına uğraması xüsusi narahatlıq yaradır.

Biz hansı ölkədə yaşadığımızı unutmamışıq. Oktay Güləliyevin başına gələnləri, siyasi məhbusları müdafiə etdiyi üçün bir neçə tanınmış vəkilin Vəkillər Kollegiyasından uzaqlaşdırılmasını yaxşı xatırlayırıq.

Ona görə də hakimiyyətə müraciət edirəm, onsuz da sayənizdə ölkədə çox az vəkil qalıb ki, siyasi məhbusların hüquqlarını müdafiə etməyə cəsarət etsin. Fəxrəddin Mehdiyev və digər müstəqil vəkillərdən əl çəkin, ya da ədalət mühakiməsi imitasiyasından tamamilə imtina edib, vəkillik institunu da ləğv edib, keçin birbaşa NKVD "troyka"larına.

Ancaq unutmayın ki, heç nə, heç kim əbədi deyil. Bütün pisliklər kimi bugünkü pisliklər də tariximizin utancverici səhifələri olaraq gəlib keçəcək!"

Əli Kərimli AXCP sədri.