İyulun 23-də Ali Məhkəmədə Azərbaycan Xalq Cəbhəsi Partiyasının (AXCP) sədri Əli Kərimli barəsində çıxarılmış cinayət hökmünün ləğvi ilə bağlı kassasiya şikayətinə baxılıb. Hakim Nazim Mövsümovun sədrliyilə keçirilən prosesdə şikayət təmin olunmayıb, aşağı instansiya məhkəmələrinin qərarları qüvvədə saxlanılıb.

Əli Kərimli məhkəməyə qatılmayıb. Onu prosesdə vəkili Fəxrəddin Mehdiyev təmsil edib. Vəkil bildirib ki, müvəkkili haqqında Cinayət Məcəlləsinin 147.1-ci (böhtan) maddəsi ilə çıxarılmış hökm və həmin hökmü qüvvədə saxlayan apellyasiya qərarı hüquqi əsaslardan məhrumdur.

“Bu iş ümumiyyətlə icraata qəbul edilməməliydi. Çünki ortada cinayət təqibi üçün əsas yox idi. Sadəcə siyasi motivlərlə sifariş edilmiş bir qərarla qarşı-qarşıyayıq”, – deyə Fəxrəddin Mehdiyev vurğulayıb.

Qeyd edək ki, Əli Kərimli son illər hökuməti sərt tənqid edən siyasətçilərdən biri kimi çıxış edir. O, barəsindəki cinayət işini siyasi sifariş kimi qiymətləndirir.