Milli Məclisdə payız sessiyası çərçivəsində müzakirəyə çıxarılan yeni qanun layihəsi Daxili Qoşunların səlahiyyətlərinin genişləndirilməsini nəzərdə tutur. Qanun dəyişikliyi qəbul ediləcəyi təqdirdə, qoşunlar bir sıra hallarda polis orqanları ilə eyni hüquqlara malik olacaq.

Layihəyə görə, Daxili Qoşunlara polis əməkdaşlarının səlahiyyətləri həvalə olunduqda, onlara “Polis haqqında” qanunla müəyyən edilmiş vəzifələr də şamil ediləcək. Bu isə qoşunlara ictimai asayişin qorunması və təhlükəsizlik tədbirlərində daha geniş fəaliyyət imkanı yaradacaq.

Qanunda nəzərdə tutulan digər müddəalara əsasən, Daxili Qoşunlar:
• dövlət obyektlərinin mühafizəsində və onlara edilən basqınların dəf edilməsində iştirak edəcək,
• qanunsuz daxil olmuş şəxslərin axtarışında və tutulmasında yer alacaq,
• ictimai qaydanın qorunması və kütləvi tədbirlərdə təhlükəsizliyin təmin olunmasında məsuliyyət daşıyacaq.

Bundan başqa, kütləvi iğtişaşların qarşısının alınması, qanunsuz silahlı birləşmələrə, terror təşkilatlarına və dini ekstremizmə qarşı əməliyyatlarda da Daxili Qoşunların səlahiyyətləri artırılacaq. Qanun layihəsində həmçinin girovların azad edilməsi, zəbt olunmuş obyektlərin geri qaytarılması, eləcə də nəqliyyat vasitələrinin – təyyarə, qatar və gəmilərin qaçırılması hallarının qarşısının alınması kimi xüsusi hallarda qoşunların iştirakı nəzərdə tutulur.

Ekspertlər hesab edirlər ki, bu dəyişikliklər rejimin cəmiyyətdəki potensial narazılıqlara və gələcək iğtişaş ehtimallarına qarşı qabaqlayıcı addım atdığını göstərir.