Azərbaycanda hakimiyyətə yaxın media qurumlarında çalışan jurnalistlər üçün yeni imtiyazların tətbiqini nəzərdə tutan qanun layihəsi Milli Məclisə təqdim olunub.

“Media haqqında” qanun layihəsində qeyd edilir ki, Media Reyestrinə daxil edilən jurnalistlərə müvafiq icra hakimiyyəti orqanının müəyyən etdiyi qurum tərəfindən xüsusi vəsiqə veriləcək. Həmin vəsiqənin etibarlılıq müddəti üç il olacaq.

Vəsiqə sahibləri üçün bir sıra güzəştlər nəzərdə tutulur. Belə ki, onlar jurnalist fəaliyyəti ilə bağlı dövlət və bələdiyyə mülkiyyətində olan muzeylərə, qalereyalara və digər mədəni-ictimai tədbirlərin keçirildiyi obyektlərə ödənişsiz daxil ola biləcəklər.

Bundan əlavə, həmin jurnalistlər dövlət orqanları, müəssisə və təşkilatlar, eləcə də qeyri-hökumət təşkilatları tərəfindən akkreditasiya olunmaq hüququ qazanacaqlar. Layihəyə əsasən, onlar müvafiq icra hakimiyyəti orqanının təşkil etdiyi təlimlərdə ödənişsiz və ya güzəştli əsaslarla iştirak edə biləcəklər.

Qanun layihəsində bu jurnalistlərin sosial müdafiəsinin gücləndirilməsi və maddi təminatının yaxşılaşdırılması da nəzərdə tutulur. Gələcəkdə onların güzəştli ipoteka proqramlarından yararlanması imkanı da istisna edilmir.

Media subyektlərinin rəhbərlərinə isə xidməti pasportların verilməsi məsələsi gündəmdədir.

Eyni zamanda bildirilir ki, müxalif yönümlü media qurumları və jurnalistlər Media İnkişafı Agentliyi tərəfindən süni maneələrlə qarşılaşır, onların Media Reyestrində qeydiyyatı aparılmır.

Layihənin yaxın vaxtlarda parlament müzakirəsinə çıxarılması gözlənilir.