Azərbaycan Dövlət Neft Şirkəti (SOCAR) İtaliyanın ən iri neft emalı zavodlarından birini almağa hazırlaşır. Bu barədə “Reuters” agentliyi məlumat yayıb.

Xəbərə görə, şirkəti idarə edən Bracchetti-Peretti ailəsi zavodun dəyərini təxminən 2,5 milyard avro olaraq qiymətləndirib. Razılaşmanın detalları hələlik açıqlanmasa da, SOCAR-ın Avropada enerji sektoruna yatırımlarını genişləndirməsi diqqət çəkir.

SOCAR-ın illik hesabatı: 31 min 500 nəfər ixtisara düşüb

Beynəlxalq bazarda iri alqı-satqı müqavilələri müzakirə olunduğu bir vaxtda SOCAR özünün illik hesabatını da açıqlayıb. Rəqəmlərdən görünür ki, son 15 ildə şirkətdə 31 min 500 nəfər işçi ixtisar olunub.

Bu statistika cəmiyyətdə birmənalı qarşılanmayıb. Tənqidçilər bildirirlər ki, SOCAR xaricdə milyardlarla avroluq sərmayələr yatırdığı halda, ölkə daxilində minlərlə insan işsiz qalıb.

Xaricdə sərmayələr – daxildə işsizlik

SOCAR son illərdə Türkiyədən başlayaraq Avropanın müxtəlif ölkələrində strateji enerji layihələrinə qoşulub. Şirkət bu addımları Azərbaycanın beynəlxalq enerji bazarında nüfuzunu artırmaqla izah edir.

Bununla belə, iqtisadçılar hesab edirlər ki, ölkə daxilində sosial problemlərin, xüsusən də işsizlik və əmək bazarının daralmasının fonunda SOCAR-ın xaricdə iri investisiyalara yönəlməsi suallar doğurur.

Şirkət mövqeyini açıqlamayıb

Hələlik SOCAR rəhbərliyi nə ixtisarlarla, nə də “Reuters”in yaydığı zavodun alınması barədə məlumatla bağlı rəsmi açıqlama verməyib.

Ekspertlərin fikrincə, bu cür müqayisəli vəziyyət Azərbaycan vətəndaşlarının rifahı ilə dövlət şirkətinin xarici siyasəti arasındakı balans məsələsini gündəmə gətirir.