USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Azərbaycanlı fəal Türkiyədə deportasiya mərkəzində saxlanılır
İstanbulun Çatalca kəndində yerləşən deportasiya mərkəzində azərbaycanlı tələbə və fəal Nanəxanım (Nana) Babazadə “xarici terrorçu döyüşçü” ittihamı ilə saxlanılır.
OC Media-nın məlumatına görə, iki il əvvəl təhsil məqsədilə Türkiyəyə gələn Babazadə həm də müxtəlif sosial və siyasi fəallıq qruplarına qoşulub. O, xüsusən heyvan hüquqları və feminist etirazlarda iştirak edib.
Avqustun 21-də işlədiyi kafedə saxlanılan Babazadə polis tərəfindən zorakılıq və təhqirlərə məruz qaldığını iddia edir. Onun vəkilləri bildirirlər ki, müvəqqəti saxlanma zamanı qeyri-insani rəftar, qanunsuz axtarış və tibbi yardımın göstərilməməsi halları qeydə alınıb.
Hazırda Babazadə barəsində G89 kodu ilə deportasiya işi aparılır. Bu kod adətən terrorçu qruplaşmalara qoşulmaq şübhəsi ilə əcnəbilərə tətbiq edilsə də, hüquq müdafiəçilərinin sözlərinə görə, Türkiyədə tez-tez fəallara qarşı da istifadə olunur.
Babazadə Azərbaycana deportasiya olunacağı halda həyatının təhlükədə olacağını bildirib. Onun vəkillərinin apellyasiya şikayəti sentyabrın 11-də məhkəmə tərəfindən rədd edilib, lakin yenidən müraciət etmək niyyətindədirlər.
Müxtəlif hüquq müdafiə təşkilatları Türkiyədəki deportasiya mərkəzlərində sistematik hüquq pozuntuları, işgəncə və məcburi “könüllü qayıdış” hallarının geniş yayıldığını vurğulayırlar.
