USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Ülvi Həsənlinin həyat yoldaşına ölkədən çıxış qadağası tətbiq olunub
“Abzas Media işi” üzrə məhkəmə prosesi yekunlaşsa da, həbsdə olan jurnalistlərin ailə üzvlərinə qarşı məhdudiyyətlər qüvvədə qalır.
Məlum olub ki, hazırda həbsdə olan “Abzas Media” direktoru Ülvi Həsənlinin həyat yoldaşı Rübabə Quliyevanın ölkədən çıxışına qadağa qoyulub.
Quliyeva sentyabrın 28-də Strasburqda keçirilən və həyat yoldaşının finalçılarından biri olduğu Vatslav Havel İnsan Haqları Mükafatının təqdimetmə mərasimində iştirak etməli idi. Lakin hava limanında pasport yoxlanışı zamanı ona Daxili İşlər Nazirliyi tərəfindən ölkədən çıxışına qadağa qoyulduğu bildirilib. Qadağanın hansı işlə bağlı olduğu isə açıqlanmayıb.
Rübabə Quliyeva bildirib ki, məsələ ilə bağlı Bakı Şəhər Baş Polis İdarəsinin Ağır Cinayətlərin İstintaqı Şöbəsinin müstəntiqi Samir İsmayılov ilə əlaqə saxlayıb, lakin müstəntiq vəziyyətdən xəbərsiz olduğunu və araşdırma aparılacağını deyib.
Qeyri-iş günü olduğuna görə, DİN-dən məsələ ilə bağlı münasibət öyrənmək mümkün olmayıb.
Xatırladaq ki, 2023-cü ilin noyabrında “Abzas Media”nın direktoru Ülvi Həsənli, baş redaktor Sevinc Vaqifqızı, layihə koordinatoru Məhəmməd Kekalov, araşdırmaçı jurnalist Hafiz Babalı, jurnalistlər Elnarə Qasımova və Nərgiz Absalamova, həmçinin iqtisadçı-jurnalist Fərid Mehralızadə həbs edilmişdi. Onlara qarşı qaçaqmalçılıq və maliyyə cinayətləri ittihamları irəli sürülsə də, həm jurnalistlər, həm də beynəlxalq təşkilatlar bu ittihamları əsassız adlandırıblar.
İyunun 20-də Bakı Ağır Cinayətlər Məhkəməsi Həsənli, Vaqifqızı, Babalı və Mehralızadəni 9 il, Absalamova və Qasımovanı 8 il, Kekalovu isə 7 il 6 ay müddətinə azadlıqdan məhrum edib. Sentyabrın 9-da Bakı Apellyasiya Məhkəməsi bu hökmü qüvvədə saxlayıb.
