Azərbaycan Xarici İşlər Nazirliyi Türkiyənin 31 vətəndaşını “arzuolunmaz şəxs” elan edib və onların Azərbaycan ərazisinə girişinə qadağa qoyub.

XİN qərarın həmin şəxslərin sosial şəbəkələrdə və müxtəlif internet platformalarında Azərbaycanla bağlı yaydıqları açıqlamalarla əlaqədar qəbul edildiyini bildirib.

Nazirliyin açıqlamasında qeyd olunur ki, həmin şəxslərin Azərbaycan Respublikasının suverenliyi, milli təhlükəsizliyi, konstitusiya quruluşu, xalqı və rəhbərliyinə qarşı yönəlmiş, hakimiyyətin zorla dəyişdirilməsinə, dini radikalizm zəminində zorakılığa, dini nifrət və düşmənçiliyin qızışdırılmasına çağırış xarakterli çıxışları nəzərə alınıb.

Siyahıya Türkiyədə fəaliyyət göstərən siyasətçilər, jurnalistlər, media nümayəndələri, ilahiyyatçılar, yazarlar və ictimai xadimlər daxildir.

“Arzuolunmaz şəxs” elan edilənlər bunlardır:

1. Ahmet Barış İyison – “İyison Medya” və “Gazeteciabi” layihəsinin rəhbəri
2. Cem Özyurt – bloger
3. Akın Duru – TV8 və Acunmedya əməkdaşı
4. Dursun Eker – jurnalist
5. Adem Özköse – jurnalist, siyasi analitik və yazıçı
6. Muhammed Emin Yıldırım – “Köklü Değişim” media qrupunun İstanbul təmsilçisi
7. Cüneyt Sezer – bloger, sosioloq və siyasi analitik
8. Serhat Koyuncu – ictimai xadim
9. Mikail Ayyıldız – dini yazar və araşdırmaçı
10. Ahi Aratoğlu – araşdırmaçı yazar, şair və sosioloq
11. Muharrem Çavuş – AK Parti Boğaziçi Gənclik Qollarının keçmiş rəhbəri
12. Fatih Erbakan – Yeniden Refah Partiyasının sədri
13. Yahya Uğraş – HÜDA PAR sədrinin müavini
14. Aydın Binboğa – iqtisadçı və siyasətçi
15. Hakkı Eren – “Köklü Değişim” jurnalisti
16. Sait Seyitoğlu – HÜDA PAR-ın Batman təşkilatının rəsmisi
17. Mehmet Boynukalın – Marmara Universitetinin professoru, Ayasofyanın keçmiş imam-xətibi
18. Okan Aytaş – jurnalist, “Finansopia Medya”nın sahibi
19. Mert Armağan – jurnalist
20. Yaşar Yavuz – jurnalist
21. Ahmet Sırrı Arvas – şair, jurnalist və yazıçı
22. Yusuf Kaplan – yazıçı və jurnalist
23. Erdinc Teğmen – “Erte Medya”nın sahibi
24. Ahmet Çakar – idman şərhçisi və keçmiş futbol hakimi
25. Halil Atakan Ay – ilahiyyatçı
26. İsmail Kılıçarslan – TV NET və “Yeni Şafak” əməkdaşı
27. Murat Şahin – Akit TV aparıcısı
28. İrfan Kaya Ülger – Akit TV aparıcısı
29. Fatin Dağistanlı – Akit TV aparıcısı
30. Ömer Ulutaş – Toprak Partiyasının sədri
31. Ömer Faruk Gergerlioğlu – Türkiyə parlamentinin deputatı.

Siyahıda Türkiyənin tanınmış siyasi fiqurlarından Yeniden Refah Partiyasının sədri Fatih Erbakan və parlament üzvü Ömer Faruk Gergerlioğlu ilə yanaşı, bir sıra jurnalist və media nümayəndələrinin də yer alması diqqət çəkir.

Azərbaycan XİN bildirib ki, ölkəyə qarşı çağırışlar və düşmənçiliyi təşviq edən fəaliyyətlərlə bağlı bundan sonra da qanunvericiliyə uyğun tədbirlərin görülməsi davam etdiriləcək.