Türkiyənin Yenidən Rifah Partiyasının sədri Fatih Ərbakanın Azərbaycana girişinə qadağa qoyulub.

Onun adı Azərbaycan Xarici İşlər Nazirliyinin “arzuolunmaz şəxslər” elan etdiyi 31 Türkiyə vətəndaşı arasında yer alıb.

XİN bildirib ki, qərar həmin şəxslərin sosial şəbəkələrdə və internet platformalarında Azərbaycanın suverenliyinə, milli təhlükəsizliyinə, konstitusiya quruluşuna, xalqına və rəhbərliyinə qarşı yönəlmiş açıqlamaları, həmçinin hakimiyyətin zorla dəyişdirilməsinə, dini radikalizm zəminində zorakılığa və dini nifrətin qızışdırılmasına çağırışları nəzərə alınaraq qəbul edilib.

Fatih Ərbakan oktyabrın 14-də sosial şəbəkə hesabında yayımladığı videoda Azərbaycanda məktəblərdə hicab məsələsinə toxunmuş, hicablı şagirdlərin dərsə buraxılmadığını iddia etmiş və Azərbaycanla Ermənistan arasında müqayisə aparmışdı.

Son günlər Azərbaycanda məktəblərdə hicab məsələsi ciddi ictimai müzakirələrə və etirazlara səbəb olub. Daxili İşlər Nazirliyi oktyabrın 12-də bu etirazlarla əlaqədar 37 nəfərin saxlandığını açıqlayıb. Nazirlik həmin şəxslərin ictimai qaydanı pozan hərəkətlərdə iştirak etdiyini bildirib.

Fatih Ərbakan Türkiyənin keçmiş baş naziri Nəcməddin Ərbakanın oğludur. O, hazırda Yenidən Rifah Partiyasına rəhbərlik edir.

Azərbaycan XİN bəyan edib ki, ölkəyə qarşı düşmənçiliyi təşviq edən və qanunvericiliyə zidd çağırışlar edən şəxslərlə bağlı analoji tədbirlərin bundan sonra da davam etdirilməsi mümkündür.