Münxen Ali Əyalət Məhkəməsi Azərbaycandan rüşvət almaqda ittiham olunan Almaniya Bundestaqının keçmiş üzvü Aksel Fişer barəsində hökm çıxarıb. Məhkəmənin qərarına əsasən, Fişer 1 il 2 ay müddətinə şərti həbs cəzasına məhkum edilib.

Məhkəmə Almaniya Baş Prokurorluğunun mövqeyini əsaslı hesab edərək, Aksel Fişeri rüşvət almaqda təqsirli bilib. Prokurorluq onun üçün 1 il 8 ay şərti həbs cəzası tələb etsə də, müdafiə tərəfi tam bəraət istəyirdi.

Şifahi hökmün əsaslandırılmasında bildirilib ki, Fişer Avropa Şurası Parlament Assambleyasının (AŞPA / PACE) üzvü olduğu dövrdə, illər ərzində Azərbaycanın maraqlarını müdafiə etmək qarşılığında on minlərlə avro məbləğində nağd pul alıb. Məhkəmə qeyd edib ki, ödənişlərin bir hissəsi həmin əməllər Almaniya qanunvericiliyinə görə hələ cinayət sayılmadığı dövrdə həyata keçirilib.

İttihama görə, Aksel Fişer 2010–2018-ci illər ərzində AŞPA-da Azərbaycanı müsbət təqdim edən çıxışlar edib, həmçinin məxfi sənədləri ötürüb. Prokurorluq uzun və mürəkkəb məhkəmə prosesində çoxsaylı dolayı sübutlara istinad edib.

Qeyd edək ki, Fişer ötən il dekabrın 22-dən istintaq təcridxanasında saxlanılırdı. Buna səbəb onun məhkəmə iclaslarına dəfələrlə qatılmaması olub. Hökm oxunduqdan sonra məhkəmə tərəfindən barəsində seçilmiş həbs qətimkan tədbiri ləğv edilib və o, azadlığa buraxılıb. Bu barədə məhkəmənin sədri Yoxen Bösl məlumat verib.

Məhkəmənin qərarına əsasən, Aksel Fişerin 2 il müddətinə passiv seçki hüququ da əlindən alınıb. Bu müddət ərzində o, nə parlamentə, nə də hər hansı dövlət vəzifəsinə seçilə bilməyəcək. Halbuki prokurorluq onun 3 il müddətinə həm aktiv, həm də passiv seçki hüququndan məhrum edilməsini tələb edirdi.

Bundan əlavə, Fişer “Qurbanlara Yardım” fonduna 12 min avro ödəməlidir. Bu məbləğ prokurorluğun tələb etdiyi 80 min avrodan xeyli azdır.

Karlsruhe-Land seçki dairəsindən Bundestaqa seçilmiş Aksel Fişer ittihamları sonadək rədd edib. O bildirib ki, Azərbaycan lehinə səsvermə və ya digər fəaliyyətlərə görə heç vaxt pul və ya hər hansı fayda almayıb və səsini “satmayıb”. Müdafiə tərəfi prokurorluğun təqdim etdiyi sübutları “ehtimal xarakterli”, əsas şahid ifadələrini isə yalan adlandırıb.

Lakin məhkəmə bu arqumentləri qəbul etməyib və həm Fişerin, həm də onun həyat yoldaşının ifadələrini inandırıcı hesab etmədiyini bəyan edib.