Bu gün paytaxtın Sabunçu rayonunun Balaxanı qəsəbəsində jurnalist Əvəz Hafizli qətlə yetirilib. Hadisə ilə bağlı Baş Prokurorluq və Daxili İşlər Nazirliyi birgə məlumat yayıb.

Rəsmi məlumata görə, 24 yaşlı Əmrulla Güləliyev şəxsi münaqişə zəminində Əvəz Hafizliyə bıçaqla xəsarət yetirib. Jurnalist hadisə yerindəcə həyatını itirib. Hadisə ilə bağlı cinayəti törətməkdə şübhəli bilinən Ə.Güləliyev saxlanılıb və hazırda istintaq aparılır.

Əvəz Hafizli "Kanal 13" internet televiziyasının əməkdaşı idi. O, mediada fəaliyyət göstərdiyi dövrdə sosial və ictimai məsələlərə dair reportaj və çıxışları ilə tanınırdı.

Qeyd edək ki, Əvəz Hafizli son illərdə jurnalist fəaliyyəti ilə əlaqədar dəfələrlə təhdidlərə və təzyiqlərə məruz qaldığını ictimaiyyətə açıqlamışdı. Onun ölümü media cameəsində və hüquq müdafiəçiləri arasında ciddi rezonans doğurub.

Hazırda hadisənin motivləri və təfərrüatları araşdırılır.