Azərbaycanın sabiq təhsil naziri, Qərbi Azərbaycan İcması Müşahidə Şurasının sədri Misir Mərdanovun səhhətində problem yaranıb.

Əldə etdiyimiz məlumata görə, eks-nazir xəstəxanaya yerləşdirilib və ilkin tibbi müdaxilə olunub. Bəzi mənbələr onun əməliyyat keçirdiyini iddia etsə də, əməkdaşımız xəbəri dəqiqləşdirmək üçün birbaşa Misir Mərdanovla əlaqə saxlayıb.

Sabiq nazir xəstəxanada olduğunu təsdiqləyib:
“Hazırda xəstəxanadayam, amma ciddi bir əməliyyat keçirməmişəm. Bu gün xəstəxanadan çıxacağam. Səhhətimdə elə böyük bir problem yoxdur. Narahatlığa əsas yoxdur. İnşallah, sabah işdə olacağam”, – deyə Mərdanov bildirib.

Qeyd edək ki, Misir Mərdanov 1992–1996-cı illərdə Bakı Dövlət Universitetinin tədris işləri üzrə prorektoru, 1997–1998-ci illərdə isə rektoru olub. O, 1998-ci ildən 2013-cü ilin aprel ayına qədər Azərbaycan Respublikasının təhsil naziri vəzifəsində çalışıb.

Hazırda Misir Mərdanov Elm və Təhsil Nazirliyinin tabeliyində fəaliyyət göstərən Riyaziyyat və Mexanika İnstitutunun direktoru vəzifəsini icra edir.