Hazırda paytaxt Bakının bir neçə istiqamətində söküntü işləri aparılır. Bəzi ərazilərdə proses özəl şirkətlər tərəfindən həyata keçirilir və çoxmənzilli yaşayış binaları ilə fərdi evlər sökülür.

Ən genişmiqyaslı işlər isə Yasamal rayonunun “Sovetski” adlanan ərazisində dövlət tərəfindən aparılır. Məlumata görə, torpaq sahələri dövlət ehtiyacları üçün alınır və yaxın gələcəkdə burada iri parkların salınması planlaşdırılır.

İlin sonunadək “Sovetski” ərazisində 4200-dən çox mülkiyyətin sökülməsi nəzərdə tutulur. Rəsmi plana əsasən, artıq 600-ə yaxın poliqon tamamilə, təxminən 850 poliqon isə qismən sökülüb. Layihənin məqsədinin Bakını daha müasir və rahat şəhərə çevirmək olduğu bildirilir.

Qeyd olunur ki, yenidənqurma işləri zamanı mülki irs nümunələri və mühüm dövlət binalarının sökülməsi nəzərdə tutulmur. Rəsmi yanaşmaya görə, tarixi irsin qorunması ilə müasir şəhərsalma prinsiplərinin uzlaşdırılması hədəflənir.

Xatırladaq ki, daha əvvəl Mərkəzi Parkın salınması da oxşar şəkildə aparılan geniş söküntü işlərindən sonra mümkün olmuşdu.