Azərbaycan Baş Prokurorluğu iki rusiyalı jurnalist və bir media eksperti barəsində cinayət işi çərçivəsində həbs qətimkan tədbiri seçildiyini və onların beynəlxalq axtarışa verildiyini açıqlayıb.

Söhbət “Moskva 24” telekanalının aparıcısı və jurnalisti İvan Knyazev, siyasi məsləhətçi və media eksperti Semyon Uralov, həmçinin televiziya jurnalisti Aleksey Çadayevdən gedir.

Baş Prokurorluğun məlumatına görə, iyulun 14-də Uralovun “YouTube” kanalında yayımlanan “Чистота понимания” verilişində Azərbaycana qarşı zorakılığa, ölkənin konstitusiya quruluşunun dəyişdirilməsinə və ərazi bütövlüyünün parçalanmasına çağırışlar səsləndirilib.

Prokurorluq həmin çıxışlarda milli nifrət və düşmənçiliyin salınmasına yönələn çağırışların da olduğunu iddia edir.

Qurumun məlumatında avqustun 13-də eyni kanalda yayımlanan digər verilişə də diqqət çəkilib. İstintaq orqanının qənaətinə görə, həmin buraxılışda Azərbaycana qarşı zorakı üsullardan istifadə, ayrı-ayrı şəxslərin “birbaşa fiziki məhvetmə təhlükəsi altında saxlanılması və ünvanlı şəkildə sıradan çıxarılması” barədə fikirlər səsləndirilib.

Baş Prokurorluq bu çıxışlarda terrorçuluğa açıq çağırışların olduğuna dair əsaslı şübhələrin müəyyən edildiyini bildirib.

Baş prokurorun qərarı ilə Knyazev, Uralov və Çadayev Azərbaycan Cinayət Məcəlləsinin terrorçuluğa açıq çağırış, dövlət əleyhinə yönələn açıq çağırışlar, eləcə də milli nifrət və düşmənçiliyin salınması ilə bağlı maddələri üzrə təqsirləndirilən şəxs qismində cəlb ediliblər.

Onların Azərbaycan hüdudlarından kənarda olması səbəbindən barələrində axtarış elan edilib və məhkəmə tərəfindən həbs qətimkan tədbiri seçilib.

Baş Prokurorluq həmin şəxslərin xarici ölkələrdə müəyyən edilərək saxlanılması və Azərbaycana təhvil verilməsi məqsədilə aidiyyəti dövlət qurumlarına müraciət edildiyini, həmçinin İnterpol kanalları vasitəsilə beynəlxalq axtarışın təşkili istiqamətində tədbirlərin görüldüyünü açıqlayıb.

Cinayət işi üzrə ibtidai istintaq Baş Prokurorluğun İstintaq İdarəsində davam etdirilir.