FİFA-nın prezidenti Canni İnfantino Afrika Millətlər Kubokunun final oyununda baş verən qalmaqallı hadisələrə münasibət bildirib.

İnfantino Seneqal yığmasının və bəzi azarkeşlərin həlledici matçdakı davranışını kəskin tənqid edib. Final görüşünün əlavə vaxtında hakim Mərakeş millisinin xeyrinə penalti təyin etdikdən sonra Seneqal futbolçularının əksəriyyəti etiraz əlaməti olaraq meydanı tərk edib. Eyni zamanda tribunlarda da gərginlik yaşanıb, bəzi Seneqal azarkeşləri meydana daxil olmağa cəhd göstərərək mühafizəçilərlə toqquşublar.

Hadisələrdən sonra Seneqal futbolçuları yenidən meydana qayıdıblar. Təyin olunan penaltini Mərakeş millisinin üzvü Brahim Diaz yerinə yetirsə də, zərbə dəqiq olmayıb.

FİFA prezidenti açıqlamasında bildirib:

“Biz bəzi azarkeşlərin, eləcə də Seneqal yığmasının futbolçuları və komanda heyətinin davranışını qətiyyətlə qınayırıq. Meydanı bu cür tərk etmək qəbuledilməzdir. İdmanda zorakılıq yolverilməzdir. Hakimlərin qərarlarına hər zaman hörmət edilməlidir. Komandalar yalnız qaydalar çərçivəsində mübarizə aparmalıdır. Futbolçular və azarkeşlər milyonlarla insan üçün nümunə olmalıdır”.

Qeyd edək ki, qalmaqallı məqamlara baxmayaraq, final matçında Seneqal yığması əlavə vaxtda Mərakeşi 1:0 hesabı ilə məğlub edərək Afrika Millətlər Kubokunun qalibi olub.