Gecə saatlarında Belarus Prezidenti Aleksandr Lukaşenkonun təyyarəsi Türkiyənin Bodrum şəhərinə eniş edib.

Teleqraf.com xəbər verir ki, bu barədə Ukrayna mətbuatı məlumat yayıb.

“Özünü Belarus prezidenti elan edən Aleksandr Lukaşenkonun ailəsinin biznes-jeti ölkəni tərk edib və hazırda Türkiyədədir”, - məlumatda deyilir.

EW-301PJ uçuş nömrəli “Bombardier Challenger 850” layneri saat 00:01-də Minskdən havaya qalxıb, 05:15-də Bodrumda eniş edib. Təyyarə Rusiya səmasında olarkən transponderləri söndürüb və yalnız Kalmıkiya üzərində yenidən işə salıb.

Ukrayna mətbuatı bununla Rusiyadakı mövcud durum arasında paralellik aparıb. “Vaqner” rəhbəri Yevgeni Priqojin müdafiə naziri Sergey Şoyqunu dövlətə xəyanətdə ittiham edərək, öz ordusu ilə Ukraynadan Rusiyanın Rostov şəhərinə daxil olub.

Bu gün səhər saatlarından etibarən Moskvada bütün kütləvi tədbirlər ləğv edilib, şəhərin küçələrində çoxsaylı yük maşınları, zirehli texnikalar və təhlükəsizlik qüvvələri görünməyə başlayıb.