Qətl 500 000 ABŞ dolları müqabilində planlaşdırılıb.

ABŞ-nin Federal Məhkəməsi Gürcüstan vətəndaşı, əslən azərbaycanlı olan 40 yaşlı Polad Ömərov və Azərbaycan vətəndaşı 46 yaşlı Rafət Əmirovu İran hökumətinin dəstəyi ilə Nyu-Yorkda iranəsilli amerikalı jurnalist və fəal Məsih Alinecada qarşı sui-qəsdin təşkilində təqsirli hesab edib.

Onlara qarşı ümumilikdə beş maddə – sifarişli qətl, sifarişli qətlin yerinə yetirilməsi məqsədilə sözləşmə, çirkli pulların yuyulması məqsədilə sözləşmə, hədə-qorxu ilə tələb etmək məqsədilə adam öldürməyə cəhd, odlu silahın saxlanılması və istifadəsi üzrə ittihamlar irəli sürülüb.

“Müttəhimlər Nyu-Yorkda İran rejimini tənqid edən iranlı amerikalı dissidenti öldürmək üçün planda iştirak ediblər",- Federal Təhqiqat Bürosunun Əks-kəşfiyyat şöbəsinin direktor müavini Roman Rojavski deyib.

Ədliyyə Departamenti bildirib ki, hər iki şəxs ABŞ mediasında müxtəlif şəkildə Rusiya və ya Şərqi Avropa cinayət şəbəkəsi kimi təsvir edilən "Təşkilat" adlı mütəşəkkil cinayət qrupunun üzvləridir. Onlar əlavə ediblər ki, iki nəfər Alinecadı öldürmək üçün “İran İslam İnqilabı Keşikçiləri Korpusunun (SEPAH) yüksək rütbəli üzvləri” tərəfindən işə götürülüb.

İran əvvəlcə Alinecadı qaçırmağa cəhd etmişdi, lakin bu cəhdlər uğursuzluğa düçar olduqdan sonra təşkilat Ömərov və Əmirovu ABŞ-da ona sui-qəsd etmək üçün işə cəlb edib. Daha sonra ikisi Təşkilatın ABŞ-da yaşayan başqa bir üzvü Xalid Mehdiyevi cəlb edib.

Ədliyyə Departamenti bildirib ki, Mehdiyev Alinecadı müşahidə edib və 2022-ci ilin iyulunda Ömərova onu öldürməyə hazır olduğunu bildirib. Mehdiyev daha sonra həbs edilib və Ömərov onunla əlaqə saxlaya bilməyəndə Mehdiyevin anası ilə əlaqə saxlayıb, onu tapa bilməyəcəyi təqdirdə onu və digər oğlunu öldürəcəyi ilə hədələyib.

Cinayət işi üzrə yekun qərar sentyabr 17-də elan ediləcək.

48 yaşlı Məsih Alinecad 2009-cu ildə İranı tərk edib və Nyu-Yorkda yaşayır.